P711M Infra Projects, Giduso sa RPAB Caraga

Ni Alex Mapoy

RPAB Members headed by RD Edna Mabeza signs the resolution endorsing P711 worth of sub-projects for PRDP funding. Photo courtesy of RPCO-13 InfoACE Emmylou T. Presilda

BUTUAN CITY – Giduso na sa Caraga Regional Project Advisory Board (RPAB) ang halos P712 million Infrastructure Projects proposal sa nagkadaiyang Local Government Units (LGUs) ning rehiyon human hingpit nga na aprubahan sa duha ka adlaw nga deliberasyon nga gipahigayon sa nakalabay’ng semana.

Naningkamot ang mga LGUs nga mapundohan ang gidusong mga proyekto sunod tuig ilawom sa Philippine Rural Development Project (PRDP).

Tipik lamang ang maong kantidad sa P27.5 billion World Bank project nga gipatuman sa Department of Agriculture (DA), nasudnong panggamhanan, ug sa lokal nga panggamhanan.

Unom ka tuig ang programa sa PRDP nga gisugdan pagpatuman adtong 2013 ug mahuman sa umaabot 2019.

Sumala ni RPCO-13 InfoACE Emmylou T. Presilda, gituyo pagmugna ang naasoy’ng programa aron mahatagan og katumanan ang tinguha sa goberno nga makab-ot ang “modern, climate-smart and market-oriented agri-fishery sector.”

Dugang ni Presilda, nitabang ang DA Regional Project Coordination Office (DA-RPCO) sa PLGUs aron mapadali ang pagduso sa PRDP proposal sa ingon magahinan kini og pundo sunod tuig.

Giklaro sa opisyal nga dili lamang ang mga LGUs ning rehiyon ang nanginahanglan sa maong pundo kondi tibuok nasod ang naningkamot ug nag-apas nga mapundohan ang gidusong proyekto hinungdan nga paunhanay ang pagduso sa proposal.

Ang nahisgotang proposal ang giduso ngadto sa Program Support Office Mindanao Cluster alang sa pagahimuong rebyu aron pagsusi kon nakasunod ba ang matag proyekto sa gipatumang criteria.

Human masusi sa Program Support Office Mindanao Cluster, iduso usab kini ngadto sa National Program Coordination Office alang sa laing hugna sa pag-rebyu ug approval.

“Considering the immense demand from LGUs nationwide and that funding is on a first come first serve basis, DA Regional Project Coordination Office (DA-RPCO) has assisted PLGUs to fast track submission of PRDP proposals for inclusion in the 2016 allocation of the Project,” pagklaro ni Presilda.

Gitin-aw ni DA Caraga Regional Director ug RPAB Chair Edna Mabeza nga makuting pagsusi ang ilang gihimo sa nahisgotang mga proposal sanglit dako kini og kalambigitan sa pag-uswag sa sektor sa agrikultura ning rehiyon.

Paneguro usab ni RD Mabeza nga matag pundo nga ibubo sa goberno ning rehiyon pinaagi sa PRDP, mapalig-on ang ekonomiya ning rehiyon ug magpadayon ang paglambo sa sektor sa agrikultura.

Gilauman sa direktor nga sa tabang unya sa pito ka mga sub-projects, mas mapalambo pa ang pamatigayon sa agri-fishery sama sa lubi, abaka, ug balanghoy

Ilawom sa Intensified Building up sa Infrastructure and Logistics for Development (I-BUILD), nagduso ang rehiyon sa Caraga sa PRDP sa mo sunod nga mga sub-projects nga aprubado sa RPAB: P272.5 milyones nga kantidad sa 2 ka Farm to Market Roads (FMR) sa Surigao del Norte; P50.5 milyones alang sa pagkonkreto sa kalsada sa Mabuhay – Bagumbayan FMR nga sakop sa Province of Dinagat Island; P156.1 milyones alang sa pagkonkreto sa Bay-ang – Mahaba FMR ug tulay sa Cabadbaran City sakop sa Agusan del Norte; P170 milyones sa FMR sa lungsod sa Cortes, Surigao del Sur; P33.3 milyones alang sa FMR sa lungsod sa San Agustin, Surigao del Sur; ug P29.3 milyones alang sa pag-ayo sa Culit Communal Irrigation Project sa lungsod sa Nasipit, Agusan del Norte.