Tourist Arrivals sa Caraga Nisaka

Ni Alex Mapoy

Pipila sa mga personahe sa Department of Tourism (DOT) Caraga kinsa nagtinabangay pagmonitor sa tourist arrivals ning rehiyon. Photo by Alex Mapoy

BUTUAN CITY – Gipasigarbo sa Department of Tourism (DOT) Caraga ang pagsaka sa ihap sa tourist arrivals ning rehiyon sa unang kwarter ning tuiga.

Sa datos nga gihikyad ni DOT Caraga Administrative Aide III Kristine Joy Shalom P. Carlos, ang tourist arrival sa Caraga sa unang kwarter ning tuiga ang niabot sa 210,745.

Sa maong ihap, 195,739 ang domestic tourist, 13,778 ang foreign tourist, samtang 1,228 ang overseas.

Ang maong ihap, mas taas og 3.65 porsyento (3.65%) kon itandi sa nakalabay’ng tuig sa samang period nga anaa lamang sa 203,314.

Makita usab sa datos, ang pinakadaghan og tourist arrivals sa mga siyudad ning rehiyon ang dakbayan sa Surigao nga dunay 58,833, nagsunod ang dakbayan sa Butuan nga dunay 56,837; ikatulo ang Tandag City nga dunay 9,825; ikaupat ang Bislig City nga dunay 8,663, ug ang ikalima mao ang Cabadbaran City nga dunay 2,924.

Samtang sa mga probensya, nanguna ang Surigao del Norte nga dunay pinakadaghang tourist arrivals nga moabot sa 27,604; nagsunod ang Agusan del Sur nga dunay 23,519; ikatulo ang Surigao del Sur nga dunay 11,240; ikaupat ang Agusan del Norte nga dunay 6,260; ug ikalima ang Dinagat Island nga dunay 5,040.

Sa pagsulat ning balita, padayon pang gikonsolida sa rehiyonal nga buhatan ang tourist arrivals sa ikaduhang kwarter ning tuiga.

Ang pagsulbong sa ihap sa tourist arrivals ang nagtimaan nga mo kusog ang industriya sa turismo diin sa maong paagi, daghang negosyo ang mamarug sanglit maengganyo naman unya ang mga turista sa pagbubo og puhonan.