Pagtaas sa Tourist Arrival, Nahimong Hagit

Ni Alex Mapoy

BUTUAN CITY – Dakong hagit sa kadumalahan sa Department of Tourism (DOT) Caraga ang padayon nga pagsaka sa ihap sa mga langyaw nga maglulinghayaw ning rehiyon.

Sa datos, tuig 2013, nilagpas og 15.74% ang tourist arrivals samtang 17.79% ang gisaka sa nakalabay’ng tuig 2014.

Ning tuiga, tinguha sa rehiyonal nga buhatan nga padayon nga mo saka o malabwan ang ihap sa tourist arrivals sa nakalabay’ng tuig ning rehiyon adiser mahuman ang kasamtangang tuig.

Pinasubay sa pinakaulahing datos sa buhatan nga gihikyad ni DOT Caraga Administrative Aide III Kristine Joy Shalom P. Carlos, sa unang tulo ka bulan ning tuiga, nalabwan ang ihap sa tourist arrivals sa nakalabay’ng tuig sa samang period.

Ang foreign tourist arrivals sa unang kwarter ning tuig, nilansang sa 13,778 kansa mas taas og 1,347 kon itandi sa nakalabay’ng tuig sa samang period nga anaa lamang sa 12,431.

Subay niini, kayod pa gihapon ang rehiyonal nga buhatan aron makab-ot ang ilang target nga kon dili man ugaling ma-doble ang ihap sa tourist arrivals, malabwan ang record sa nakalabay’ng tuig.

Kabahin sa paningkamot sa ahensya mao ang pakig-alayon ngadto sa pribadong sektor aron matabangan kini pag-promote sa rehiyon.

Nanguna pa gihapon ang mga langyaw nga naglulinghayaw ning rehiyon ang gikan sa mga nasod sa Estados Unidos, Australia, China, Canada, Germany, Korea, Japan, Pransya, Espanya, ug United Kingdom.

Sagad sa gibisita sa mga langyaw’ng turista dinhe sa rehiyon ang Agusan Marsh sa Agusan del Sur, mga historical places sama sa balangay sa Agusan del Norte, Enchanted River ug Tinuy-an Falls sa Surigao del Sur, ug Siargao Island sa Surigao del Norte.