IPs Gipasagdan sa Goberno?

Ni Alex Mapoy

Grupo sa Indigenous Peoples sa rehiyon sa Caraga

BUTUAN CITY – Wala gipasagdan sa goberno ang mga Indigenous Peoples (IPs) kinsa gikonsidera nga kanunay’ng maulahi sa pagpahimulos sa gihanyag nga batakang serbisyo.

Gikabutyag ni PhilHealth Caraga Public Relations Officer I Kenneth Po, gihatagan sa goberno og pagtagad ang mga IPs labi na sa ilang kaugmaon.

Dugang ni Po, isa sa mga serbisyong gihanyag sa goberno ngadto sa mga lumad mao ang serbisyong panglawas diin libre kining makadangop sa pinakaduol nga health center o rural health center aron magpahiling.

Gawas matod pa sa libreng serbisyo, mahatagan ang mga IPs sa libre nga tambal nga haum sa gihambin nga balatian nga nagtimaan lamang nga wala nagpasagad ang kagamhanan sa maong sektor.

“Ang atong goberno, wala nagpabaya. Nagtan-aw usab sa ilang kaugmaon pinaagi sa pag-promote sa serbisyong panglawas,” pasalig ni Po.

Subay niini, gi-awhag sa opisyal ang tanang IPs nga dili magduha-duha pagpahimulos sa maong serbisyo sanglit gidisenyo kini alang kanila.