Karapatan: No Rally sa Otaza Killing

Ni Alex Mapoy

PROTESTA. Walay ipahigayon nga lihok protesta ang Karapatan Caraga sama niini nga hulagway aron ikondina ang kamatayon sa mag-amahang Otaza sanglit ang mga biktima, mga armado, dunay gihuptang armas.  

BUTUAN CITY – Dili magpahigayon og lihok protesta ang Karapatan Caraga aron ikondina ang kamatayon sa mag-amahang Otaza sanglit ang mga biktima pulos mga armado.

Gikabutyag ni Karapatan Caraga Secretary General Eliza Pangilinan, nakatutok lamang ang alyansa sa pagtabang sa mga sibilyan nga walay ikasukol ngadto sa armadong grupo.

Dugang ni Pangilinan, partikular nga tabangan sa alyansa mao ang mga sibilyan kinsa nadamay sa bangi sa duha ka armadong grupo sama sa awtoridad ug rebelde.

Giangkon sa naulahi, ilang gikasubo ang nahitabo sa mag-amahang Otaza, apan ang pagpangita og hustisya sa kamatayon sa duruha ang ila kining isalig ngadto sa awtoridad alang sa hinanaling pagsikop sa mga kriminal.

“Regarding sa nahitabo kay Mayor Otaza: nagsubo usab kami sa panghitabo, apan ang alyansa dili ang angay nga mo tubag niana.  Ang Karapatan usa ka alyansa nga garesponde ug tigpanalipod sa tawhanong katungod  ilabina sa mga sibilyan nga naa sa tunga sa  panagbangi sa duha ka nagbangi nga gobyerno nga anaay mga puwersa sa armado,” pagtin-aw ni Pangilinan.

Wala usab nalilong sa nahisgotan nga dihang giransak sa armadong grupo ang panimay sa pamilyang Otaza, nakuhaan og daghang armas hinungdan nga ilang gikonsidera ang mga biktima nga dili simpleng sibilyan.

Tungod sa paghupot og armas sa mga biktima, dayag na lamang matod pa nga duna kini kaaway nga armado.

“Apan ang nahitabo kay mayor ug sa iyang anak nga according sa TV ug radio bisan sa newspaper nga kini nakuhaan og armas. Klaro kini nga dili sila simpleng sibilyan. Armado ug adunay mga kaaway nga armado apan wala ta kabalo. Dili kami ang angay nga manubag og maghatag og reaksyon tungod kay kini nga kaso, anaa na sa kamot sa mga autoridad ug bisan man gale sila, wala pay kompirmasyon sa kung kinsa ang nipatay niining mga biktima,” pagtin-aw sa nauwahi.