Pushers Gipaluyohan sa PDEA Agents?

Ni Alex Mapoy

PDEA Caraga Regional Director Julius Navales

BUTUAN CITY – Gipanghimakak sa Philippine Drug Enforcement Agency (PDEA) Caraga ang nikatap nga impormasyon nga gipaluyohan sa mga ahente sa buhatan ang mga drug pushers ning rehiyon.

Sumala ni PDEA Caraga Regional Director Julius Navales dihang nahinabi sa mga tigbalita, ikapasalig niya nga dunay integridad ang tanan niining mga ahente.

Dugang ni Navales, hugot usab niya kining gipanubayan aron maseguro nga walay ni bisan usa sa iyang mga sakop ang maghatag mantsa sa gidumala niyang buhatan.

Sukad nilingkod pagka-regional director ang opisyal, standing order sa nauwahi nga kon dunay sakop niini nga mapamatud-an nga nilambigit pagpayuhot sa gidiling drugas, iya kining tanggalon sa puwesto ug taralon ngadto sa hukmanan.

Alayon niini, gidasig sa opisyal ang publiko nga kon duna kini mahibaw-an nga indibidwal nga nagpayuhot sa gidiling drugas, bisan lakip ang iyang mga sakop nga malambigit sa maong iligal, dili kini magpanuko sa pagdakop ug paghatag tukmang aksyon.

Dumduman nga sa nakalabay’ng bulan, isa sa mga sakop sa rehiyonal nga buhatan nga dunay ranggo nga Administrative Aide ang gipasakahan og kaso human nagpositibo ang ihi nga dunay content sa methamphetamine ug iligal nga paghupot sa armas.