Caraga Sikat sa Asya

Ni Alex Mapoy

DOT Caraga Acting Marketing Officer Celia Valencia.
Photo by Alex Mapoy

BUTUAN CITY – Ilado na sa tibuok kontinente sa Asya ang rehiyon sa Caraga nga dunay daghang mga lugar nga nindot kasuruyan.

Segon ni Department of Tourism (DOT) Caraga Acting Marketing Officer Celia Valencia, kon basehan ang ihap sa mga langyaw’ng turista ning rehiyon matag tuig, padayon kining nagkataas.

Basi sa datos, tuig 2013, nilagpas og 15.74% ang tourist arrivals samtang 17.79% ang gisaka sa nakalabay’ng tuig 2014.

Sa unang kwarter ning tuiga, kampante ang rehiyonal nga buhatan nga malagpasan ang orihinal niining target labi pa nga sa inisyal nga datos, nisubra na ang ihap sa mga langyaw nga gilaumang mo bisita dinhe sa rehiyon.

Gawas nga nahimong ilado ang Caraga sa Asya, naila usab kini sa pipila ka mga gamhanang nasod sama sa Estados Unidos, Australia, China, Canada, Germany, Korea, Japan, Pransya, Espanya, ug United Kingdom.

Dugang ni Valencia, kasagaran sa gibisita sa mga langyaw’ng turista dinhe sa rehiyon ang Agusan Marsh sa Agusan del Sur, mga historical places sama sa balangay sa Agusan del Norte, Enchanted River ug Tinuy-an Falls sa Surigao del Sur, ug Siargao Island sa Surigao del Norte.

Alayon niini, gikalipay sa kadumalahan sa rehiyonal nga buhatan nga mas daghang langyaw ang na engganyo pagbisita ning rehiyon.

Subay niini, nanawagan ang opisyal sa tanang Caraganons nga mo bisita usab sa giila nga mga tourist destinations ning rehiyon aron matabangan niini ang mga langyaw pagiya kon asa ang nindot nga mga lugar nga mahimong kasuruyan.