Police Visibility Epektibo

Ni Alex Mapoy

Deputy Station Commander Police Inspector Victor P. Butcon.  

BUTUAN CITY – Nagpagawas og marching order ang liderato sa Police Regional Office (PRO) 13 nga pahugtan ang police visibility ning rehiyon.

Isip paghatag katumanan sa maong mandato, gidugangan ni Police Chief Superintendent David Yalong Ombao og mga personahe ang matag presento sa kapulisan.

Gihimo kini ni PCSupt Ombao aron mamintina ang kahapsay ug kalinaw sa rehiyon sa Caraga.

Sa kabahinan ni Deputy Chief Police Inspector Victor P. Butcon sa Ambago Police Station, dako og tabang ang maong kamanduan sanglit mas niubos ang kreminalidad partikular na sa area of responsibility (AOR).

Dugang ni Butcon, isip pagsanong sa maong kamanduan, nagpahigayon sila og house-to-house nga pagbisita aron mahatagan og kutay ang katawhan pagpaabot sa mga nag-una niining mulo batok kreminalidad.

Pasabot sa opisyal, dili na mahago pa ang katawhan pagsumbong sa ilang reklamo ngadto sa kapulisan sanglit anaa man ang ilang personahe sa dapit dis-a kini nagpuyo.

Matag panimay nga mabisitahan sa ilang personahe ang hatagan kini sa personal nga contact number aron dali kining makasumbong kon dunay hitabo nga angayang respondihan sa kapulisan.

Sa maong paagi, mas mailhan sa katawhan ang mga pulis nga nadestino sa nasangpit nga dapit ug niana, makapundar kini og pagsalig sanglit ang pulis na mismo maoy niduol sa komunidad.

Sukad gipakusgan ang maong kampanya, sagad nga mga kremin ang natala pulos na lamang ginagmay sama sa kawat.

Bisan pa man, naningkamot ang kapulisan nga masulbad ang nahisgutang matang sa kremin dungan sa pagdasig sa nahimong biktima nga pasakahan og kaso ang madakpang kawatan aron kini makakat-on og tagam.