Kahimtang sa Panarbaho Gikadismaya

Ni Alex Mapoy

Gisunog sa mga nagmartsa ang hulagway ni Pangulong Noynoy
Aquino atol sa pagsaulog sa Labor Day, adtong Bernes.

BUTUAN CITY – Gipakita sa Kilusang Mayo Uno (KMU) Caraga ang kadismaya sa goberno ni Pangulong Noynoy Aquino pinaagi sa pagpahigayon og pikit-rally sa bisperas sa Adlaw sa Pamuo, pagmartsa sa kadalanan, ug pagsunog sa hulagway sa presidente taliwala sa kalsada adtong Bernes, Labor Day.

Wala gikahimuot sa grupo ang kasamtangang sistema diin pulos lamang pasalig ang nahimo sa gobernong Aquino, apan ang gipaabot nga mga yangongo sa yanong katawhan labi na sa mga trabahante  sama sa pagpalabang sa P16,000 nga nationwide minimum wage.

Luyo sa naglagiting nga kainit sa adlaw niadtong adlawa, gi-antos pagbaktas sa mga mamumuo nga gipaluyohan sa progresibong grupo ang dalang Montilla padulong sa Guingona Park ning siyudad bitbit ang mga bandera nga gipangpatikan sa nagkadaiyang “demand” sa sektor sa mamumuo sama sa tigbaligya ug pagpabaya sa mamumuo, ahente sa kontraktwalisasyon, author sa ubos nga suholan, supremo sa paglapas sa mga katungod sa mga mamumuo, ug designer sa pagmasaker sa mamumuo.

Sa kabahinan usab ni DOLE Caraga Regional Director Atty. Johnson Cañete, gikalipay niya ang gihimo sa nagpakabanang sektor nga nagpahigayon og martsa rally.

Mga nagmartsa ni-ukopa sa isa ka lane sa kalsada.

Pasabot ni RD Cañete ngadto sa mga tigbalita, katungod sa mga mamumuo ang pagpasibaw sa ilang demanda ug kabahin usab kini sa ilang katungod isip nagpuyo ning demokrasyang nasod.

Gipasibaw usab sa grupo ang mga nasodnong isyu sama sa Mamasapano incident, pork barrel, panaliton, suholan, kontraktwal, pasista, dili seryoso sa hinabing pangkalinaw, pabaya sa kalamidad, ug paka-aron-ingnon nga programa.

Adiser nangabot ang mga trabahanteng nagmartsa inubanan sa militanteng grupo, nagbaktas kini sa dalang Montilla ning siyudad padulong sa Guingona Park samtang ang giilang mga lider sa grupo ang nakigtagbo sa mga tigbalita aron ipaabot ang mga nag-unang isyu sa kalibotan sa panarbaho.

Sumala ni KMU Caraga Secretary-General Jacinto Tanduyan, pait ang kahimtang sa mga mamumuo ning rehiyon diin padayon kining nag-antos sa ubos nga suholan ug kadaghanan nagpabiling kontraktwal, ug wala nahatagan sa klaro nga benepisyo.

Basi sa datos nga gihikyad ni Tanduyan, 2 milyones ka mga Caraganons ang dunay klaro nga trabaho diin 52% niini ang anaa nagtrabaho sa sektor sa agrikultura, 39% sa services, ug 9% sa industriya sa mina.

Demand sa yanong katawhan, gigisi atubangan sa tigbalita
human pabilin nga nagpakabuta-bungol ang gobernong
Aquino.

Taliwala nga dunay trabaho ang mga nahisgutan, apan, pabilin gihapon kining nag-antos sa kalisod ug nag-apas sa inadlaw’ng balayrunon sama sa tubig, kuryente, pamasahe, ug labaw sa tanan pagpalit sa batakan nga panginahanglan.

Pamugos sa nahisgutan, ang ubos nga sweldo nga gidawat sa mga trabahante ang kanunay’ng kulang labi na nga permi nagsaka ang presyo sa batakan nga panaliton bunga usab sa pagsulbong sa presyo sa lana sa pangkalibutanong merkado.

Subay sa kadismaya sa grupo, gipanggisi sa mga nahisgutan ang papel nga gisulatan sa ilang demand atubangan sa mga tigbalita gumikan sa kawalay aksyon sa goberno paghatag niini og katumanan.