Family Assessment Sugdan Na

Ni Alex Mapoy

DSWD Caraga Kalahi-CIDSS Information
Officer III Eunice Montaos. Photo
by Alex Mapoy

BUTUAN  CITY – Pormal nang sugdan ang 2^nd Round sa Family Assessment sa Listahanan project sa Department of Social Welfare and Development (DSWD) Caraga karong Lunes, Mayo 11 ning tuiga.

Hisayran, mokabat sa 1,577 ka mga “newly-hired field workers” ang gipailawom sa pagbansay sa ahensya alang sa hingpit nga implementasyon sa proyekto.

Ang kinatibuk-ang ihap nga gibansay naglangkob sa mga area coordinators, area supervisors, enumerators, encoders, ug verifiers.

Gilauman sa ahensya nga ang tanang newly-hired field workers nga ipadala sa nagkadaiyang dapit ning rehiyon sa Caraga ang mahimong epektibo sa tahas nga gisangon sa ahensya kanila.

Sumala ni DSWD Caraga Kalahi-CIDSS Information Officer III Eunice Montaos atol sa gipahigayong Padayag 2015, lauman sa katawhang Caraganon nga dunay mangabot nga mga field workers gikan sa rehiyonal nga buhatan nga magpahigayon sa pag-assess sa pamilya.

Una nang gipaabot ni DSWD Caraga Social Marketing Unit Maria Cecilia N. Sosas nga tuyo niini nga proyekto nga makuha ang sakto ug kredible nga datos nga maoy ibutang sa “database” sa giilang “kabos nga pamilya” ning rehiyon.

Oras mahuman ang nasangpit nga assessment, ang datos nga makuha maoy ibutang sa database sa ingon kadtong tinuod nga kabos maoy angayan nga mahatagan og tabang gikan sa kagamhanan.

Sa maong datos, matabangan ang tanang partners sa ahensya sama sa mga ahensya sa goberno ug ubang stakeholders nga maoy magsilbing sumbanan sa ipatuman niining “Social Protection Programs and Services.”

Daan nang gipahimangnuan ni DSWD Caraga Regional Director Minda B. Brigoli ang mga nahisgutan nga bug-at ang tahas nga isangon sa ahensya kanila labi na sa pagkuha sa husto ug kredible nga datos gikan sa mga pamilya ning rehiyon.

Dugang ni Brigoli, ang makuha nga datos maoy mag-ila sa ekonomikanhong kahimtang sa matag Caraganon diin pinaagi sa maong datos, matumbok kon kinsa nga mga pamilya ang angayang tabangan.

Pahimangno sa director, angayan nga himuon ang responsibilidad sa matag usa nga kinasingkasing labi na nga ang kaugmaon sa makonsiderang kabos nga pamilya ning rehiyon, nagdepende kini sa datos nga makuha sa mga nahisgutan.