Kwarta Di Na Magamit

Ni Alex Mapoy

BSP Butuan Branch Research Analyst Francis Alfred C. Bokingo

BUTUAN CITY – Dili na magamit ang nahuptang kwarta nga papel de bangko (peso bill) pag-abot sa 2017.

Giklaro ni Research Analyst Francis Alfred C. Bokingo sa BSP Butuan Branch, kadtong mga karaang kwarta o papel de bangko ang dili na magamit sa 2017 sanglit alisdan na kini og bag-o.

Dugang ni Bokingo, ang karaang kwarta magamit pa kini pagpalit sa bisan unsay gustong paliton sugod adtong Enero 1 hangtod Disyembre 31 ning tuiga.

Subay niini, kadtong nagtigum og karaang kwarta mahimo nang pabayluan sa awtorisado nga bangko o kaha diretso sa pinakaduol nga sangang buhatan sa BSP.

Sunod tuig, ang karaang kwarta, dili na puwede nga magamit pagpalit sa bisan unsang butang, apan, mahimo pa kining pabayluan ngadto sa mga bangko o kaha sa BSP Offices.

Gitin-aw ni Bokingo, paningkamotan sa katawhang Pilipino nga mapabayluan ang tinaguan nga karaang kwarta ngadto sa bangko sanglit mawad-an na kini og bili karong 2017.

Sa maong tuig, dili na kini dawaton o bayluan sa BSP o sa bisan asa nga bangko hinungdan nga masayang lamang ang tinigum nga karaang kwarta kon kini dili pabayluan sugod karon hangtod sunod tuig.

Mintras aduna pay taas nga panahon, mas maayong hinayhinayan kini pagpabaylo, tambag sa opisyal ngadto sa bangko aron dili kini makalimtan labi na nga ang kalimot walay gahom.

Nasuta nga nibunga sa kalibog sa mga tawo ang pag-abot sa karaan ug bag-o nga kwarta hinungdan aron mawala kini nga kalibog, alisdan og bag-o ang mga karaan.

Gawas niana, halos 30 ka tuig na nga gigamit ang mga karaang kwarta sama sa P1,000; P500; P100; P50; P20 hinungdan nga kinahanglan na kining ilisan og bag-o labi pa nga dunay pipila ka grupo ang naghimo na og peke nga kwarta nga susama usab og panagway sa tinuod nga kwarta.

Ang mga karaang kwarta, gipagawas kini sugod adtong 1985 hinungdan nga halos tulo ka dekada na kini nga gigamit sa katawhan.

Bugtong ilisan nga karaang kwarta mao lamang kadtong mga papel ug walay labot ang mga sensilyo.