Kampanya Batok HIV Gihingusgan

Ni Alex Mapoy

HIV Infection

BUTUAN CITY – Kayod-kalabaw ang Department of Health (DOH) Caraga pagbatok sa Human Immunodeficiency Virus (HIV) ning rehiyon.

Gihimo kini sa ahensya human nigawas sa survey nga ang Caraga maoy ika-No. 2 sa ranking sa mga rehiyon sa nasod nga dunay taas nga kaso sa HIV.

Sumala ni DOH Caraga Director IV Dr. Minerva P. Molon, ang epektibong pang-alkontra sa pagkaylap sa sakit ang HIV Counselling ug Voluntary Testing.


Dugang ni Dr. Molon, nindot kini nga serbisyo nga ikahanyag sa ahensya aron mapugngan ang pagkaylap sa HIV ingon sa Sexually Transmitted Infections.

Pasabot sa direktor, katuyuan sa counselling mao ang pag-usab sa batasan lambigit sa “safe sexul practices.”

Gi-awhag usab sa opisyal ang kabatan-onan nga likayan ang sayo nga paglambigit sa pakighilawas o kaha mas maayo dili una kini mo sulod sa maong matang sa buluhaton.

Dili lamang usab ang kabatan-onan ang puntirya sa maong counselling kondi ang tanan ug gidasig ang matag usa nga batasanon ang mo sunod: pagpugong sa pakighilawas, pagpakamatinud-anon sa asawa o bana, ug batasanon ang hustong paggamit og condom.

Gidasig usab sa nahisgutan kadtong indibidwal nga grabe ka aktibo sa natad sa pakighilawas nga pahimuslan ang gitanyag nga libreng HIV Counselling aron kini masayod unsaon nga dili mataptan og HIV. Gawas niana, angayan usab nga boluntaryo kining magpa-HIV Testing.

Pasabot sa opisyal, malikayan ang walay kaayohan nga sakit nga HIV, kon ang matag usa makamao nga mo pugong sa kaugalingon ug usbon ang kinaiya kansa maoy nakita nga epektibong hinagiban aron mapugngan ang pagkuyanap sa nasangpit nga sakit.

“HIV counselling and voluntary testing are the primary services we can provide to prevent the spread of HIV and other Sexually Transmitted Infections among high risk populations. Counselling, aimed at behavioural change ultimately aims for safe sexual practices. For our young adolescent population, we highly encourage delaying of sexual debut or abstaining from sexual acts. Also, for the general public, we highly encourage the observance of the ABCs of HIV-STI Prevention such as, Abstaining from sexual activity, Being Faithful to your partner and Correct and Consistent Condom use. We highly encourage those who belong to the High Risk Population and those who are sexually active to avail of our free HIV counselling to be educated on the risks and prevention of HIV and other STIs and confidential Voluntary HIV Testing. In the case of HIV, which has no Cure, Prevention and Behavior change are the primary tools to combat the spread of this disease,” pahayag ni Dr. Molon.

Ang nahisgutang lakang kabahin kini sa HIV Counselling and Voluntary Testing Week nga ipahigayon karong Mayo 11 hangtod 15 ning tuiga.