BMC Shortage, Giangkon; LGU Naningkamot Kaha?

Ni Alex Mapoy

KAKULANGON. Bunga sa kakulang sa doctor sa Butuan Medical Center, ang mga pasyente nga magpakonsulta sa buntag, magabin-an na kini pagpauli. Gitin-aw sa BMC leadership nga naningkamot ang LGU Butuan pagtubag sa maong suliran, apan mag-eleksyon na lang sunod tuig, wala gihapon kini nasulbad.

BUTUAN CITY – Walay lipud-lipod nga gi-angkon sa kadumalahan sa Butuan Medical Center (BMC) nga kulang ang ihap sa ilang doctor nga mo atiman sa tanang pasyente hinungdan kini malangan sa pagpauli.

Gitin-aw usab sa maong tambalanan nga naningkamot ang local government unit (LGU) Butuan pagpang-hire og dugang mga doctor, apan hangtod karon, wala gihapon nahatagan og kasulbaran ang maong suliran hinungdan nga gikwestyon sa mga reklamante kon naningkamot bang tinuoray ang kagamhanang lokal o wala?

Una nang gireklamo sa pipila ka mga buros ang kalangan sa OB-Gyne doctor pag-atiman kanila sanglit ang unahon pag-atiman mao kadtong mga buros nga manganak ug gi-caesarian samtang ulahi nang ma-atiman ang mga nahisgotan alang sa pag-prenatal.

Dili lang ang mga buros ang nireklamo kondi lakip na ang mga pasyente sa Medicine, ug Surgery sanglit tag-usa lamang ka buok doctor ang mag-duty hinungdan nga malangan pag-ayo ang tanang magpakonsulta.

Sumala ni BMC Assistant Hospital Director ug General Surgery Dr. Andre C. Malbas, kulang ang BMC og 25 – 30 ka mga doctor aron idugang sa kasamtangang mga empleyadong doctor kinsa nadestino sa upat ka mga major services sama sa OB-Gyne, Medicine, Surgery, ug Pedia.

Dugang ni Dr. Malbas, nagkulang ang ihap sa ilang mga doctor dili tungod sa isyu sa sweldo sanglit competitive ang sweldo sa gobernong tambalanan ngadto sa pribadong ospital.

Pinakaubos nga sweldo sa doctor sa maong tambalanan anaa sa P39,000 wala pay labot ang ubang benepisyo, apan walay nangaplay sanglit kasagaran sa mga bag-ong doctor nga mi-gradwar, adto kini sa dagkong siyudad manarbaho samtang ang uban manglangyaw tungod sa kadako sa sweldo nga naghulat kanila.

“Lisod pangitaon ang doctor. Para sa ako, lisod pangitaon ang doctor in a provincial level. Ang bag-ong graduate nga doctor karon, mangita man gyud og greener pasture. Taas nga sweldo. Sa term ni President Aquino, government doctors are paid well. Ang pinakaubos nga sweldo sa doctor, P39,000 pinakaubos sa government hospital. That has been a problem ever since,” pag-angkon ni Dr. Malbas.

Bunga sa kakulang sa doctor, maglisod matod pa sila pag-atiman sa kada adlaw nga pagdagsa sa mga pasyente hinungdan tanang pasyente ang dugay kini nga makapauli.

Gawas nga kulang ang mga doctor, padayon matod pa nga nagsaka ang ihap sa mga pasyente nga mo dagsa kada adlaw nga dunay average nga 200 – 300 ka buok pasyente.

“Ang volume sa atong pasyente. Ato ang kasagaran sa Butuan. Ato ang Agusan del Norte. Ato ang Surigao del Norte. Ato ang Misamis Oriental. Atong personnel, gamay ra. Ang volume sa atong patients i-compare nimo, 15 – 30 years ago, hayahay ang hospital. Pag-duty nimo ana - tag – isa o duha. At present, kada duty nimo, pag-uli nimo, knocked-down ka. Higda gyud ka diretso sa inyong balay tungod sa kakapoy,” pagpasabot sa opisyal.

Gi-angkon usab sa nauwahi nga anaa sa level 2 category ang BMC, apan ang ihap sa mga doctor, wala nakaabot sa gikinahanglan ihap.

Nanginahanglan kini matod pa og 30 kapin ka mga doctor aron masunod ang rekisitos isip level 2 nga ospital.

“Sa level 2, kinahanglan ta og around 25 – 30 doctors or more. Mao nay dapat i-add sa ato,” pag-angkon sa nauwahi.

Hisayran ang populasyon sa mga doctor nga anaa nagtrabaho sa maong tambalanan, 5 sa OB-Gyne nga maoy magbahin gikan Lunes hangtod Bernes nga duty, 4 sa Medicine, 4 sa Surgery, samtang walay problema sa Pedia Section.