Gamay’ng Ulan; Kalsada Gilunop

Ni Alex Mapoy

LUNOP. Kahimtang sa kadalanan sa dakbayan sa Butuan nga bisan gamay lamang ang ulan, lunopan gilayon kini. Dugay na kini nga suliran, apan mag-eleksyon na lang sunod tuig, wala gihapon kini nasulbad.

BUTUAN CITY – Dismayado ang mga motorista ug sumasakay human naperwisyo sa kalit nga paglunop sa pipila ka mga kalsada dihang gibundakan sa pipila ka minuto nga makusog nga ulan ang siyudad sa Butuan.

Hisayran nga pipila ka mga kalsada nga sagad lunopan panahon sa ting-ulan ang T. Calo Extension Barangay Limaha, Montilla Boulevard, Agusan High School area, atbang BayanTel nga kalsada, tapad Red Cross – Butuan – Agusan del Norte chapter nga kalsada, ug daghan pang uban.

Sumala ni Tatay Osting kinsa pipila ka tuig na nga namasahero gamit ang sidecar, mag-eleksyon na lang matod pa sunod tuig, ang maong suliran, wala gihapon nahatagan og pagtagad sa kasamtangang administrasyon ning siyudad.

Dugang ni Tatay Osting, wala siya nagtuo nga adtong Bernes, mga pasado ala-1:00 sa hapon, pipila lamang ka minuto nga nibundak ang makusog nga ulan, nasanapan na dayon sa halos taga – tuhod nga gilawmon sa tubig ulan ang T. Calo Extention butang nga nakahatag pag-ayo og perwisyo kanila nga namasahero ingon man sa mga sumasakay.

Mahuman na lamang matod pa ang duha ka termino ni Butuan City Mayor Dr. Ferdinand Amante, Jr. apan, ang maong suliran, wala gihapon nahatagan sa tino nga kasulbaran.

Komento sa nauwahi, insakto nga ibida sa kasamtangang administrasyon nga highly urbanized city ang siyudad sanglit panahon sa ting-ulan, grabe usab matod pa ka “high” ang lebel sa tubig ulan nga mo sanap sa kadalanan.