Butuan Topnotcher sa HIV-AIDS

Ni Alex Mapoy 

DOH Caraga Assistant Regional
Director Dr. Cesar Cassion

BUTUAN CITY – Human nakadawat og Island of Good Governance (IGG) ang panggamhanang lokal sa dakbayan sa Butuan, nanghawod ang siyudad sa tibuok rehiyon sa Caraga human nag-topnotcher sa Human Immunodeficiency Virus Infection and Acquired Immune Deficiency Syndrome (HIV/AIDS) cases.

Basi sa datos sa Department of Health (DOH) Caraga, nilansang na sa 216 ka mga Caraganons ang nataptan sa maong sakit gikan sa tuig 1995 hangtod sa bulan sa Agosto 2015 diin 14 niini ang namatay na.

Kadaghanan sa mga nataptan ang na gikan sa probensya sa Agusan del Norte partikular na sa siyudad sa Butuan human nakatala og 85 ka buok nga HIV-AIDS patients.

Pinasikad sa datos nga gipagawas ni DOH Caraga Assistant Regional Director Dr. Cesar Cassion, sa bulan lamang sa Agosto ning tuiga, dunay pito (7) ka mga Caraganons ang bag-o nga nagpositibo sa maong sakit pinasikad sa pagkomperma sa STD/AIDS Cooperative Central Laboratory (SACCL).

Gikan sa bulan sa Enero hangtod Hulyo ning tuiga usab, ang rehiyon nakatala og 55 ka buok indibidwal ang nagpositibo sa maong sakit hinungdan nga ning tuiga lang gikan sa Enero hangtod Agosto, nakatala ang rehiyon og 62 ka buok nga nakabaton sa maong mananakod nga sakit.

Kadaghanan sa mga nataptan sa maong sakit mao kadtong nag-edad 25 – 34 anyos diin 18 anyos ang pinakabatan-on samtang 67 anyos ang pinakatiguwang nga nakabaton niini.

Sa kinatibuk-ang ihap, 203 niini mga lalaki samtang 13 lamang mga babae.

Nataptan og sakit ang mga nahisgotan tungod sa pakighilawas diin 102 niini o 47% natakdan tungod sa homosexual contact.

“Reported modes of transmission were all through contact (216). Homosexual contact 102 (47%) was the predominant mode of sexual transmission. Most (94%) of the cases were still asymptomatic at the time of Reporting with Butuan City topping the cases in the region with 85.”