Nipalta sa Trabaho, Dili Masweldohan?

Ni Alex Mapoy

NLRC Caraga Administrative V Robert
M. Aying

BUTUAN CITY – Dili makadawat og sweldo ang usa ka empleyado kon kini nipalta sa trabaho bisan pa og duna kini balido nga hinungdan sama pananglit nasakit.

Una nang gipaabot sa usa ka empleyado sa pribadong establisyemento kon nganong wala siya gi-sweldohan dihang siya ni-absent tungod sa pagkasakit.

Sumala ni National Labor Relations Commission (NLRC) Caraga Administrative V Robert M. Aying, dili makadawat og sweldo ang empleyado kon mo absent kon ang estado sa iyang pangimpleyo, dili pa regular.

Ang estado sa reklamante nga nisumbong ning mantalaan ang dili pa regular, hinonoa, usa pa siya ka contractual.

Dugang ni Aying, dili hinuon ang reklamante matanggal sa trabaho sanglit duna man kini balido nga rason diin mapamatud-an kini pinaagi sa pagpresentar sa medical certificate.

Gipasabot usab sa nauwahi, dili usab maka-avail ang reklamante sa Service Incentive Leave (SIL) o gitawag sa uban nga Leave With Pay sanglit dili kini regular.

Alayon niini, gikalipay sa opisyal ang pagpaabot sa maong reklamo sa ilang buhatan pinaagi ning mantalaan sanglit nagpakita lamang matod pa kini nga ang mga trabahante, naghatag na og bili ingon man pagpakabana sa ilang katungod isip trabahante.