Langyaw Nanginlabot sa Pulitika?

Ni Alex Mapoy

TURISTA. Duol sa kasingkasing sa mga langyaw’ng turista ang rehiyon sa Caraga tungod sa kadaghan sa mga nindot nga lugar nga kasuruyan.

BUTUAN CITY – Gikomperma sa kadumalahan sa Bureau of Immigration (BOI) Caraga nga wala pay langyaw’ng turista ang nag-apil apil sa kalihokang pulitika dinhe sa rehiyon.

Sumala ni BOI Caraga Acting Alien Control Officer Cesar Valdez, walay nadawat nga impormasyon ang rehiyonal nga buhatan nga dunay langyaw’ng turista ang nilambigit sa hisgotanan sa pulitika.

Dugang ni Valdez, kon dunay impormasyon nga madawat sa ilang buhatan, panubayan gilayon nila kini aron mahatagan sa patas nga imbestigasyon ang ni bisan kinsang langyaw’ng turista nga molambigit sa maong kalihokan.

Suble nga gitin-aw sa opisyal nga dili na lamang mo suway pag-apil apil ang mga langyaw sa kalihokang pulitika sanglit klaro ang mandato sa Department of Justice (DOJ) nga ipa-deport kini kon masakpan.

Limitado lamang matod ang political rights sa mga langyaw’ng turista hinungdan nga dili nila kini ma-ehersisyo dinhe sa nasod.

Subay niini, gikalipay sa opisyal nga taliwala nga nagkainit na ang pulitika sa nasod o bisan dinhe sa rehiyon, wala siyay nadawat nga impormasyon nga dunay nilapas sa naasoy’ng kamandoan.

Malaumon na lamang ang opisyal nga hangtod mahuman ang piliay sunod tuig, walay ni bisan isa ka langyaw’ng turista ang makalapas.