Butuan Nakuhaa’g 1 Kilo Shabu

Ni Alex Mapoy

BUTUAN CITY – Nitala ang dakbayan sa Butuan nga dunay pinakadaghang indibidwal nga nadakpan ug nakuhaan sa mga sakop sa Philippine Drug Enforcement Agency (PDEA) Caraga og halos isa ka kilo nga shabu subay sa gihimong operisyon sa ahensya sa unang tulo ka mga kwarter ning tuiga.

Pinasikad sa PDEA Caraga Accomplishment Report 2015 nga gihikyad ni PDEA Caraga Regional Director Julius R. Navales, ang dakbayan sa Butuan dunay 19 ka buok indibidwal nga nadakpan sa gihimong operisyon batok druga kinsa nakuhaan og 936.20 gramos nga shabu nga dunay market value nga P7,957,676.20 basi sa Dangerous Drugs Board (DDB) nga presyo.

Nagsunod ang Surigao del Norte nga dunay 233.41 gramos nga shabu ang nakompiska nga dunay DDB value nga P1,983,985 gikan sa posisyon sa 3 ka mga dinakpan.

Ikatulo ang Agusan del Sur nga dunay 200 gramos nga shabu nga nakompiska nga dunay DDB value nga P1,700,000 gikan sa 6 ka mga indibidwal; ikaupat, ang Surigao del Sur nga dunay 130.33 gramos nga shabu nga nagkantidad og P1,107,776.95 gikan sa 5 ka dinakpan; ikalima, ang Agusan del Norte nga dunay 0.50 gramos nga shabu nga nagkantidad og P4,250 gikan sa isa ka dinakpan; samtang ang Dinagat Island Province, walay dinakpan ug walay nakompiska nga shabu ang ahensya.

Pinakadako nga drug operation sa nasangpit nga ahensya uban ang counterpart sa PDEA Region X diin nakuhaan ang 2 ka mga suspetsado og 1 kilo ug 170.38 gramos nga shabu nga dunay DDB value nga P9,948,230.