Kalahi-CIDSS Implementation Gidayeg

Ni Alex Mapoy

BUTUAN CITY – Ni-ani og pagdayeg ang kadumalahan sa Department of Social Welfare and Development (DSWD) Caraga gikan sa nagsilbi niining mga “development partners” sa ahensya.

Partikular nga gidayeg sa development partners sa ahensya ang gipatuman nga Kapit-Bisig Laban sa Kahirapan-Comprehensive and Integrated Delivery of Social Services (KALAHI-CIDSS).

Gipahayag ni World Bank (WB) consultant Patricia Fernandez, basi sa impormasyon nga gipaabot ni DSWD Caraga KALAHI-CIDSS Regional Information Officer III Eunice Montaos, ang rehiyon lamang sa Caraga maoy iyang nakita nga napatuman sa ahensya ang grabe ka “advance” sa pagpatuman sa nahisgutang programa.

Hisayran nga nilawas nga gibisita sa mga membro sa mission team ang mga lungsod sa Gigaquit, Surigao del Norte ug Hinatuan, Surigao del Sur ug ilang nakita kon unsa ka epektibo ang maong programa.

Gipasabot ni WB consultant Miss Corinne Canlas, sumala ni Montaos nga ang tumong sa misyon mao ang paghatag dugang suporta sa pagpatuman sa Kalahi-CIDSS sa konteksto nga pagbangon gikan sa kasinatian sa Yolanda.

Namatikdan usab sa team nga suportado sa lokal nga kagamhanan ang mga programa sa ahensya.

Gawas niana, personal usab nilang nakita nga daghang mga proyekto ang nahuman sa lebel pa lang sa lungsod labi na sa Disaster Risk Mapping Facilitating Site Selection.

Sa bahin usab ni DSWD Caraga Regional Director Minda B. Brigoli, kahinaman ang maong pagbisita sanglit ang mga development partners maoy personal nga nakakuha og impormasyon gikan sa mga “frontline implementers” sa Kalahi-CIDSS sa naasoy’ng komunidad.

667 Agusanon Nakadawat og Sertipikasyon

Ni Alex Mapoy

TESDA-Agusan del Norte OIC-Provincial Dir. Emma R. De Villa (2nd from 

left) awards the diploma to the graduates of Heavy Equipment Operation 

during the Graduation Ceremony of the Butuan City Manpower 

Training Center at the City Hall Lobby. Also in photo is Catalina 

O. Tacubao (extreme right), Supervising TESD Specialist of 

TESDA-Agusan del Norte. Courtesy of TESDA Caraga

BUTUAN CITY – Gatosan ka mga Agusanon ang nahatagan og sertipikasyon gikan sa buhatan sa Technical Education and Skills Development Authority (TESDA) Agusan del Norte human kini nagmalamposon sa gisalmotan nga “skills training.”

Pinasikad sa impormasyon nga gipaabot ni TESDA Caraga Specialist 1 Robert E. Roperos, mokabat sa kinatibuk-ang 667 ka mga trainees gikan sa Butuan City Manpower Training Center (BCMTC) ang nakadawat og training certificate gikan sa Agusan del Norte Provincial Office sa nahisgutang ahensya.

“A total of 667 trainees from the Butuan City Manpower Training Center (BCMTC) have received training certificate from the Agusan del Norte Provincial Office of the Technical Education and Skills Development Authority (TESDA),” mensahe ni Roperos.

Sa gihimong graduation rites sa Butuan City Hall Lobby, gipresentar ni TESDA Agusan del Norte OIC-Provincial Dir. Emma R. de Villa ang 15 ka buok nga nakahuman sa Heavy Equipment Operation (HEO)-Wheel Loader.

Laing 15 usab ka mga trainees ang nakahuman og HEO-Hydraulic Excavator, 16 sa Massage Therapy NC II, 54 sa Basic Plumbing, 94 sa Basic Electrical Installation and Maintenance, 8 sa Basic Auto-Electrical, ug 45 sa Food Processing.

Ilawom sa Community-Based Training Program, mokabat sa 56 ka buok trainees ang nakalampos sa Siomai and Camote Making, 22 sa Burger Patties Making, 108 sa Body Massage, 31 sa Soap Making, 52 sa Table Skirting, 21 sa Footwear Making, 27 sa Candle-making, 31 sa Floor wax making, 48 sa Nail Care Services, ug 24 sa Chicharon Making.

Subay niini, gidasig ni Dir. De Villa ang mga nahisgutan nga ang nahuptang sertipikasyon nagtimaan nga ang “skills” nga nakat-onan, usa ka world-class ug kayang mo “compete” sa ubang skilled workers sa tibuok kalibotan. 

Patong-Patong nga Kaso Gipasaka Batok Balane Brothers

Ni Alex Mapoy

Alvin Balane. Courtesy of Butuan City Police Station 1

BUTUAN CITY – Patong-patong nga kaso ang atubangon sa Balane Brothers human nagpositibo ug nagmalampuson ang gihimong pagpangronda sa hiniusang puwersa sa mga awtoridad diha sa Cinderella Subdivision, Phase 2, Block 7, Lot 12, Brgy. Villa Kanangga sakop ning siyudad sa Butuan adtong Abril 24 sa ka adlawon, adlaw’ng Bernes.

Giila ni Station Commander Police Senior Inspector Nefre Telewik Acaso ang mga dinakpan nga sila Alvin Balane, 36 anyos; Arnel Balane, manghod ni Alvin, 31 anyos; ug Richard Linao, 25 anyos, pulos ulitawo, mga residente sa nahisgutang dapit; ug usa ka Jose Salugta, 29 anyos, ulitawo, nanimuyo sa P-13 Kaduging, Brgy. Amparo sakop ning siyudad.

Sumala ni PO1 Gregorio S. Mondejar, Jr., ang kasong atubangon ni Alvin mao ang kalapasan sa Section 11, 12 sa Republic Act No. 9165 o mas nailang Comprehensive Dangerous Drugs Act of 2002 ug Republic Act 10591 o mas naila nga Comprehensive Firearms and Ammunition Regulation Act.

Nakuha sa position ni Alvin ang 4 ka sachets sa suspected shabu nga gituohang dunay gibug-aton nga 5 gramos nga dunay market value nga P59 – mil; 1 ka unit sa Nokia Cellphone color itom, 1 ka bag nga dunay mga sensilyo balor P247; papel de bangko nga nagkantidad og P610; 1 ka unit nga punto 45 nga pistola nga dunay Serial No. 024863 nga dunay 1 ka magazine ug 9 ka mga buhing bala; ug uban pang mga drug paraphernalia.

Si Arnel usab, kasong kalapasan sa Section 11 ug 12 sa Republic Act No. 9165 o mas nailang Comprehensive Dangerous Drugs Act of 2002.

Arnel B. Balane. Courtesy of Butuan City Police Station 1

Nakuha sa position ni Arnel ang 1 ka sachet sa suspected shabu nga dunay gibug-aton nga 0.02 gram nga dunay market value nga P236; 1 ka unit sa Nokia cellphone color itom; 2 ka buhing bala sa shutgun; kwarta balor P100; ug mga drug paraphernalia.

Kasong kalapasan usab sa Section 11 ug 12 sa Republic Act No. 9165 o mas nailang Comprehensive Dangerous Drugs Act of 2002 ug Republic Act 8294 o Illegal Position of Explosive Device ang atubangon ni Richard.

Sa position ni Richard, nakuha ang 1 ka sachet sa suspected shabu nga nagbalor P354; 1 ka unit sa Cherry Mobile cellphone color itom; 1 ka hand grenade; ug mga drug parapherlia.

Sa bahin usab ni Jose, kasong kalapasan sa Section 15 sa Republic Act (RA) 9165 o mas nailang Comprehensive Dangerous Drugs Act of 2002 ug Republic Act 10591 o mas naila nga Comprehensive Firearms and Ammunition Regulation Act.

Jose B. Salugta. Courtesy of Butuan City Police Station 1

Nakuha usab sa position ni Jose ang 1 ka unit sa punto 45 nga Norinco Pistol nga dunay Serial No. 382297; 1 ka magazine; ug 7 ka mga buhing bala sa armas.

Gipahayag usab ni PSI Acaso, ang Balane Brothers  posible maoy responsable sa serye nga shooting incident ning siyudad sa nakalabay’ng mga adlaw o kaha bulan.

Dugang ni Acaso, posible nga ang maong grupo maoy responsable sanglit basi sa description sa mga testigos sa nakalabay’ng shooting incidents, nitugma kini.

Apan giklaro sa opisyal, oras makomperma nila nga kining grupoha maoy triggermen sa serye nga shooting incidents, dili sila magpanuko pagsang-at og laing kaso batok sa mga nahisgutan.

Asoy pa sa opisyal, kasagaran sa mga nalambigit o nahimong biktima sa shooting incidents, gipusil human wala nakabayad sa gigamit nga shabu.

Richard S. Linao. Courtesy of Butuan City Police Station 1

“Kining ilang mga description ilang mga identity mao usab ang gihatag pud nga information o mga testimonya sa mga witnesses ug sa mga biktima sa nahitabong shooting incident. Dili pud nato makomperma nga mao gyud, pero initially, pare-pareha gyud ang ilang description sa gipangsulte sa mga witnesses. Sa karon, ato unang gi-priority ang pag-serve sa search warrant, so, pagmakuha na gyud nato ang saktong mga impormasyon o statement gikan sa mga witnesses ug mga biktima atong bahin sa nanglabay nga mga shooting incidents dinhe sa siyudad, i-thru regular filing na pud nato ang kaso aron idugang batok sa mga dinakpan sa iligal nga druga. Dili pud makonsidera nato nga for hire ang grupo kay kini sila, namaligya man sila, once dunay batal o dunay dili kabayad, ila nang tirahon,” pahayag ni Acaso.

Nasayran nga gilusad ang pagpangronda subay sa gahom sa search warrant nga gipagawas sa sala ni Judge Emmanuel E. Escatron sa 10^th Judicial Region, Branch 3, Hall of Justice, Brgy. Libertad ning dakbayan adtong Abril 23, adlaw’ng Huwebes.

Gihimo kini sa hiniusang puwersa sa kapulisan partikular na sa Butuan City Police Station 1 sa pagpanguna ni PSI Acaso ug Butuan City Police Office Intel Section sa pagpangulo ni Mario Ratilla Orbita ubos sa superbisyon ni PSupt. Rommy Inway Palgue, OIC City Police Director ning siyudad.

Nagsilbing mga imbestigador sa nahisgutang ronda sila PO3 Mergel Anthony B. Plaza ug PO1 Gregorio S. Mondejar, Jr.

Water District Nagpasidaan

Ni Alex Mapoy

BCWD Senior Public Relation Officer Ramil Barquin

BUTUAN CITY – Daling gipasidan-an sa kadumalahan sa Butuan City Water District (BCWD) ang publiko kabahin sa posibleng paghinay o pagkawala sa suplay sa tubig adtong Bernes nga adlaw.

Gihimo kadto sa BCWD tungod sa pagbunok sa ulan sa Taguibo River Watershed Area sa maong adlaw.

Sumala ni BCWD Senior Public Relation Officer Ramil Barquin, nunot sa pagbundak sa ulan, taas ang posibilidad nga mo grabe ang kalubog sa tubig hinungdan nga masinatian ang maong senaryo.

Dugang ni Barquin, bisan pa man sa maong senaryo, awtomatiko nilang pa andaron ang 5 ka mga pumping stations aron suplayan ang tibuok siyudad.

Hinuon, giklaro usab sa opisyal, ang volume sa tubig nga mapagawas sa 5 ka mga pumping stations ang dili pa igo pagsuplay sa tibuok siyudad hinungdan nga dunay pipila ka mga lugar labi na kadtong nahimutang sa taas nga bahin ang mawad-an kini og suplay sa tubig.

“ADVISORY: (April 24, 2015): In view of the rainy weather at the Taguibo River Watershed, we inform the consuming public to expect low water pressure or waterless situation due to a possible incidence of high water turbidity level at the source.”

“Five (5) pumping stations will be operated to supply water in the City. However, the volume of water produced by the five (5) production wells cannot adequately supply the demand needed by the City. As such, areas located at the end points of the system, especially those located in high places may be waterless.”

Tungod sa maong senaryo, daling gitambagan sa opisyal ang publiko nga magpundo og tubig aron duna kini magamit kon ugaling masinatian ang grabe ka lubog sa tubig sa watershed area.

Mapugos ang water district pagputol sa suplay o pagsuspendi sa operisyon sa Infiltration Gallery sa ingon dili kini madaut sa lubog nga tubig.

“As a precautionary measure, we suggest that the consuming public store water to meet domestic needs. This is in preparation in case BCWD will be forced to suspend the operation of the Infiltration Gallery due to high incidence of water turbidity at the source.”

Nanghinaut na lamang ang opisyal nga sabton sa katawhan ang maong senaryo sanglit ila kining gihimo aron dili maguba ang Infiltration Gallery.