Coco Farmers Hataga’g Insentibo

Ni Alex Mapoy

PCA Caraga Acting Project Development Officer IV
 Grace Orilla. Photo by Alex Mapoy

BUTUAN CITY – Madugangan ang kinitaan sa mga coco farmers ning rehiyon ilawom sa Participatory Coconut Planting Project (PCPP).

Niadtong gusto nga mahimong benepisyaryo sa maong proyekto, ang coco farmer kinahanglan nga duna kini tunga sa ektaryang luna nga kalubian hangtod 5 ka ektarya.

Gikabutyag ni PCA Caraga Acting Project Development Officer IV Grace Orilla, nindot kini nga proyekto o programa sanglit seguradong madugangan ang kinitaan sa mga coco farmers kon mo sunod lamang kini sa gikinahanglan nga rekisitos.

Sa First Phase pa lang, ang inatiman nga katumsan, kon kini mahimong stabilized na o puwede na itanom, hatagan ang hingtungdang coco farmer sa buhatan og P18 kada katumsan o seedling.

Dugang ni Orilla, kon itanom na sa hingtungdang coco farmer ang maong katumsan og makita sa buhatan nga segurado na kining mabuhi, laing insentibo ang madawat sa nahisgutan diin bayran kini sa buhatan og P22 kada mabuhi nga katumsan.

Nindot kini nga kahigayonan, pagtin-aw sa opisyal sanglit bisan nahatagan na ang coco farmer og insentibo sa first phase ug second phase, ang tag-iya sa gibayran nga katumsan sa buhatan ang nag-seedling ug nagtanom niini.

Sa laing pagkasulte, kon si Juan maoy nag-seedling, unya gibayran kini og P18 kada seedling sa buhatan, unya, itanom kini ni Juan unya nabuhi, hatagan na usab kini og P22 kada seedling, ang tag-iya pa gihapon sa maong tinanom nga katumsan mao si Juan.

Katarungan sa opisyal, gihimo kini sa buhatan aron madasig ang mga coco farmers sa pagpadayon pagpananom og lubi aron mas mo lig-on pa ang industriya niini dinhe sa rehiyon.

Nanghinaut ang opisyal nga pinaagi niini, mas mo lambo ang panginabuhian sa tanang coco farmers nga mga Caraganons.

Niadtong gusto nga matin-awan sa maong programa, gitambagan sa opisyal nga mo dalikyat sa pinakaduol nga buhatan sa probensya.