Pundo Batok TB, Ipagawas

Ni Alex Mapoy

AGUSAN DEL NORTE – Dako ang tinguha sa Department of Health (DOH) Caraga nga mawagtang sa hingpit ang sakit nga Tuberculosis (TB) sa tibuok rehiyon hinungdan nga pipila ka mga probensya ang gitakdang hatagan og pundo alang sa maong katuyoan.

Usa sa lima ka mga probensya ang gitakdang mahatagan og pundo balor P3,050,000 milyones gikan sa DOH Caraga ang probensya sa Agusan del Norte.

Ang nahisgutang pundo magsilbing performance – base grant alang sa implementasyon sa Philippine Plan of Action to Control Tuberculosis (PhilPACT).

Gawas niana, apil na niini ang pagpaayo sa mga pasilidad ug mga gambalay nga ipatuman pinaagi sa usa ka Memorandum of Agreement (MOA).

Basi sa impormasyon nga gipaabot ni Mary Cheryl S. Monoy sa buhatan ni Community Affairs Officer IV Edgar Palarca, Jr. sa Kapitolyo Probensyal, naabot sa probensya ang 93% sa Directly – Observed Treatment Shortcourse (DOTS) Assessment Compliance Tool.

Nagtimaan matod pa kini nga nakuha ang target Case Detection Rate nga 94 sa 2011, 106 sa 2012, ug 109 sa 2013 samtang sa Cure Rate, niabot sa 89 ka mga kaso sa 2011, 92 sa 2012, ug 93 sa 2013.

Dugang ni Monoy, duna pay laing inisyatiba ang gihimo sa probensya pinaagi sa pagseguro nga mapatuman ang Multi-Drug Resistant (MDR) TB sa mga apektadong lugar hinungdan nga natutukan pag-ayo ang mga nataptan sa maong sakit.

Ang kinatibuk-ang pundo, gibahin kini sa makatulo diin ang P1,800,000 gihatag ngadto sa Provincial Health Office (PHO), P250,000 sa Cabadbaran City Health Officer, ug P1,000,000 sa Agusan del Norte Provincial Hospital.

Lauman nga ang maong pundo magamit sa husto sa ingon mahatagan og taas nga porsyento ang katumanan sa maong tinguha nga mawagtang ang maong sakit sa umaabot nga katuigan.

Ang sakit nga TB dili na angay ikabalaka niadtong mga indibidwal nga nataptan niini sanglit duna na kini kaayohan diin ang hingtungdan mo dangop lamang sa pinakaduol nga Barangay Health Center.

Hatagan ang hingtungdan og tambal nga libre sanglit ang goberno naghatag alokasyon alang sa maong sakit sa ingon  mawagtang kini sa hingpit.