Pensioner Giobliga Pagpakita

Ni Alex Mapoy

SSS Butuan Assistant Head Arnold Pepino. Photo by Alex Mapoy

BUTUAN CITY – Estrikto nga gipatuman sa Social Security System (SSS) Butuan ang Annual Confirmation of Pensioner (ACOP) sa mga membro niining pensionado.

Gihimo kini aron mapanalipdan ang buhatan sa bisan unsa mang pagpanunto nga himuon sa mga kabanay sa hingtungdan.

Sumala ni SSS Butuan Assistant Head Arnold Pepino, ang pagpakita sa pensioner ngadto sa ilang buhatan nagsilbing rekisitos aron maseguro nga ang pensioner niining membro, dako pang buhi.

Dugang ni Pepino, kon mapakyas ang hingtungdang pensioner pagbisita sa ilang buhatan, awtomatiko nga putlon ang binulan niining pension nga gidawat.

Sa higayon nga mo dalikyat ang hingtungdan aron mo reklamo nganong wala kini nakadawat og pension, pasabton gilayon ang hingtungdan nga obligasyon sa matag pensionado ang personal nga pagdalikyat sa pinakaduol nga buhatan aron makomperma nga kini dako pang buhi.

Pamugos ni Pepino, dili usab puwede nga ang anak lamang ang mo pakita sa buhatan sanglit ang awtorisado lamang nga makakomperma nga kini buhi pa mao ang hingtungdan.

Sa higayon nga maputol ang pension gumikan sa kapakyas sa hingtungdan pag-report personal sa buhatan, dili lamang angayan nga mabalaka ang hingtungdan kon kini dako pang buhi sanglit makuha gihapon kini kon makabisita ang nahisgutan sa opisina aron kompermahon nga siya dako pang buhi.

Gihimo kini sa buhatan sanglit dunay pipila ka mga kabanay sa pensioner nga bisan patay na ang hingtungdang, dili kini mag-file og death claim labi na kon makita niining gamay lamang ang makuha hinungdan nga padayon gihapon nga nakuha ang binulan nga pension.