P167.1M Gi-alokar sa Water System

Ni Alex Mapoy

BUTUAN CITY– Gipaspasan karon sa Department of Interior and Local Government (DILG) Caraga ang paghikay sa mga gikinahanglang dokumento alang sa 114 ka mga water system projects ilawom sa programang Bottom-up budgeting (BUB) sulod niining tuiga.

Milyones pesos ang kantidad nga gigahin sa goberno alang sa nahisgutang mga proyekto diin basi sa datos, mokabat sa kinatibuk-ang P167, 121,033.40 ang alokasyon niini.

Sumala ni DILG Caraga Project Management and Development Unit Officer Engr. Neil Belvan, ang nahisgutang kantidad gibahin kini ngadto sa lima ka mga probensya nga sakop niining rehiyon.

Pinasikad sa datos, P3,500,000 niini ang gigahin alang sa dakbayan sa Butuan; P33,730,577.76 sa Agusan del Norte; P40,255,500 sa Agusan del Sur; P5,500,000 sa Dinagat Island Province; P45,823,800 sa Surigao del Norte; ug P38,311,155.64 sa Surigao del Sur.  

Dugang ni Engr. Belvan, dili patas ang kantidad nga gigahin sa ahensya ngadto sa matag probensya o kaha siyudad sanglit nag-agad kini sa gidaghanon sa proyektong pa tubig.

Sa kinatibuk-ang ihap, 4 niini ang napadulong sa dakbayan sa Butuan, 28 sa Agusan del Norte, 15 sa Agusan del Sur, 3 sa Dinagat Island Province, 26 sa Surigao del Norte, ug 38 sa Surigao del Sur.

Ang mga proyekto ilawom sa BUB, target nga sugdan sa ikatulo nga kwarter niining tuiga sa ingon mapahimuslan gilayon kini sa mga residente nga nanimuyo sa dapit dis-a ipatuman ang naasoy’ng proyekto.

Taliwala pa man sa serye nga mga proyekto ang gipatuman, Salintubig man o BUB, gi-angkon sa opisyal nga dili pa makomperma sa rehiyonal nga buhatan kon nalukop na ba ang mga dapit ning rehiyon nga nabutangan og water system.

Nag-unang katuyuan sa maong proyekto, mahatagan sa limpiyo nga tubig mainom ang mga Caraganons aron dili kini magkasakit.