P12.7M Salintubig Projects Gipatuman

Ni Alex Mapoy

BUTUAN CITY – Pito ka mga water system projects ang padayon nga gipatuman sa pipila ka bahin ning rehiyon sa Caraga ilawom sa programang Salintubig.

Basi sa datos gikan sa rehiyonal nga buhatan sa Department of Interior and Local Government (DILG) Caraga, ang nahisgutan nga mga proyekto gipundohan sa goberno balor P12,730,000.

Sumala ni DILG Caraga Project Management and Development Unit Officer Engr. Neil Belvan, gisugdan pag-implementar ang nahisgutang mga proyekto sa nakalabay’ng tuig ug hangtod ning tuiga 2015, padayon pa ang implementasyon.

Dugang ni Engr. Belvan, kon mahuman ang nahisgutan nga mga proyekto, mapahimuslan kini sa libuan ka mga residente diin ilang mapuslan ang limpiyong tubig nga mahimo nilang magamit sa matag adlaw.

Sa datos, ang Agusan del Norte, dunay duha ka mga water system projects nga gipatuman partikular na sa Brgy. Bonifacio ug Brgy. Katipunan pulos sakop sa Las Nieves; 1 ka proyekto alang sa construction sa Sta. Isabel Water Supply – Phase II nga nahimutang sa Brgy. Sta Isabel, lungsod sa Sta. Josefa, Agusan del Sur; tag-isa ka proyekto alang sa kamugnaan sa Brgy. Pili Waterworks System sa Brgy. Pili, lungsod sa Malimono ug Pilar PWS Phase III, lungsod sa Pilar pulos sakop sa Surigao del Norte;   isa ka proyekto sa kamugnaan sa Level II Water System project sa Brgy. Villaverde, lungsod sa Tagbina, Surigao del Sur; ug isa ka water system project sa lungsod sa Tubajon sakop sa probensya sa Dinagat.

Ang matag proyekto gigahinan og P1,000,000 hangtod P2,500,000 nga nisumada og P12,730,000 ug kini lauman nga mapahimuslan sa lokal nga mga residente sa labing dali nga panahon.

Nasuta nga kining matanga sa proyekto ang dugay na nga gipangandoy sa mga molupyo sa nasangpit nga mga lugar nga makabaton sa klaro nga tinubdan sa tubig ug luwas nga paga-imnon sa kinabag-an.