Gawad Kalinga Beneficiary Gitambagan

Ni Alex Mapoy

Gawad Kalinga Beneficiaries' Butuan were convened by Butuan City
Water District. Courtesy of BCWD

BUTUAN CITY– Gitambagan sa kadumalahan sa Butuan City Water District (BCWD) ang tanang benepisyaryo Gawad Kalinga Butuan nga magdaginot sa pagamit og tubig labi pa nga padayong nasinatian ang huwaw dinhe sa probensya.

Gihimo kini atol sa paglusad sa City Poverty Reduction Program kagahapon sa buntag diha sa Mahay Covered Court nga gitambongan sa mga benepisyaryo sa Gawad Kalinga.

Basi sa impormasyon nga gipaabot ni BCWD Senior Public Relations Officer Ramil S. Barquin, gawas sa gihimong paglusad sa naasoy’ng programa, nagpahigayon usab ang water district og mass feeding diin napahimuslan kini sa katawhan partikular na sa mga molupyo sa naasoy’ng barangay.

“BCWD urged Gawad Kalinga recipients to save water in the wake of weak El Nino during the launching of the City Poverty Reduction Program this morning at Mahay Covered Court. In the same gathering, BCWD conducted mass feeding,” mensahe ni Barquin.

Una nang namantala ning mantalaan nga basi sa gihimong pagtuon sa Philippine Institute for Development Studies (PIDS) nga giuloha’g “Determination of Basic Household Requirements,” ang matag pamilyang Pilipino, duna kini average nga magamit nga tubig nga 6 ka litro matag adlaw alang sa pang-inom ug 12 ka litro alang sa pagluto ug uban pang gikinahanglan sa kusina. Kasagaran sa tubig nga gigamit sa matag panimay ang nagamit kini alang sa “personal hygiene” diin moabot kini og 68 ka litro kada adlaw ug 74 ka litro alang sa pagpanghinlo.

Gihingusgan sa water district ang pahimangno nga mas maayo minusan ang pagamit sa tubig ug kon mahimo, kadtong mga hinugas nga puwede pa ika-flushing sa inidoro, puwede kining gamiton.

Sa maong paagi, maminusan ang gikinahanglang tubig nga gamiton sa matag pamilya kada adlaw labi na nga inanay ang pag-ubos sa produksyon sa tubig sa watershed bunga sa epekto sa subra ka init sa panahon.