250 Armchairs Gitunol; Obispo Mapasalamaton

Ni Alex Mapoy

As part of the PNoy Bayanihan Program, DENR 13 Regional Director Nonie M. Tamayo has formally turned over 250 armchairs to Bishop Juan de Dios Pueblos, Chairperson of the Caraga Conference for Peace and Development during a simple rite held at the Father Saturnino Urios High School in SIbagat, Agusan del Sur on Wednesday, June 17, 2015. Photo by DENR Caraga Spokesperson Eric Gallego.

SIBAGAT, Agusan del Sur – Napahimuslan na sa mga estudyante sa Father Saturnino Urios High School – Sibagat ang 250 ka mga lingkoranan nga gitunol sa kadumalahan sa Department of Environment and Natural Resources (DENR) Caraga adtong Miyerkules.

Gipangunahan pagdawat sa Caraga Conference for Peace and Development (CCPD) pinaagi ni Butuan Diocese Bishop Juan de Dios M. Pueblos ang maong mga lingkoran nga gipangunayan usab pagtunol ni DENR Caraga Regional Director Nonito M. Tamayo.

Sa impormasyon nga gipaabot ni Johny Natad sa DENR Caraga, ang kahoy nga gigama og armchair gikan kini sa mga nakompiskang kahoy gikan sa mga loggers.

Ang naasoy’ng mga lingkoranan, pulos hinimo sa mga estudyante sa Nasipit National Vocational School (NNVS).

Gi-donar sa DENR Caraga ang nahisgutang mga lingkoran isip kabahin sa pagsuporta sa PNOY Bayanihan Program ni Pangulong Noynoy Aquino.

The armchairs were manufactured by the Nasipit National Vocational School from out of confiscated forest products by the DENR. Photo by DENR Caraga Spokesperson Eric Gallego.

Sa kabahinan ni Dir. Tamayo, mas gipili sa ahensya nga himuong lingkoranan ang nakompiskang mga kahoy aron mapahimuslan kini sa mga estudyante.

Alang usab ni Bishop Pueblos, ang CCPD hugot nga nisuporta sa kampanya pagbatok sa illegal logging ning rehiyon ug mapasalamaton kini sa liderato ni Dir. Tamayo nga isa ang FSUU HS-Sibagat nga nakabenepisyo sa nakompiska nga mga kahoy.

Sa gipahigayon nga hamubong seremonya, nitambong sila Environment Management Bureau (EMB) Caraga Regional Director Wilson Trajico, CENRO Nasipit OIC Norman Asugan, DENR Conservation Development Chief Maritess M. Ocampo, ug daghan pang uban.

Kahibaluan nga nasabotan sa DENR, Department of Education (DepEd), ug Technical Education and Skills Development Authority (TESDA) nga kon dunay makompiskang mga kahoy, itugyan kini sa DENR ngadto sa TESDA aron himuon og mga bangko samtang ang ginama nga mga bangko ang itunol ngadto sa DepEd aron mapahimuslan sa kabataan.