Tamdanan sa Kontribusyon Gipagawas

Ni Alex Mapoy

Pasidaan sa Social Security System (SSS) sa mga employer, angayang sundon unsay nakalatid sa maong tamdanan aron dili kini mag-atubang og asunto. 

BUTUAN CITY – Subleng gihikyad sa Social Security System (SSS) ang tamdanan sa mga employers kabahin sa saktong kontribusyon sa matag empleyado.

Gihimo kini sa buhatan human nasuta nga ubay-ubay pa gihapon sa mga employer sa rehiyon sa Caraga ang wala nagtug-an sa saktong suholan sa empleyado aron makalikay ug makaminus sa counterpart sa kontribusyon.

Basi sa tamdanan nga gihikyad ni SSS Butuan Assistant Branch Head Arnold Pepino nga gi-uloha’g New SSS Contribution Schedule, 11% sa monthly salary sa empleyado maoy kinahanglan nga i-remit sa employer sa pinakaduol nga buhatan kada bulan.

Ang kinatibuk-ang kontribusyon, bahinon kini sa employer ug employee diin 7.37% ang magsilbing counterpart sa employer samtang 3.63% ang kabahinan usab sa employee aron makompleto ang 11%.

Sa mga empleyado nga dunay binulang sweldo nga P5,000, ang monthly contribution remittance ngadto sa SSS, mo abot sa P560 diin ang counterpart sa employer anaa sa P378.30 samtang sa empleyado anaa sa P181.70.

Sa mga nagsweldo og P8,000, ang monthly contribution remittance ngadto sa SSS, moabot sa P890 diin ang counterpart sa employer anaa sa P599.30 samtang sa empleyado anaa sa P290.70.

Una nang gipasabot ni Pepino, kon wala gitug-an sa employer ang saktong sweldo sa empleyado, unya masusihon sa buhatan, ipursige ang employer nga i-remit ang kulang samtang kon kulang usab ang gikolekta sa employer nga kontribusyon gikan sa empleyado, suktan usab kini aron idugang sa daang remittance.

Samtang, gitambag sa opisyal sa tanang empleyado nga kinahanglan nga magpa-deduct kini sa employer kada bulan alang sa kontribusyon sanglit alang ra usab kini sa kaugalingong kabulahanan pag-abot sa panahon.

Alayon niini, gidasig usab sa nahisgutan ang tanang membro sa SSS nga matag kwarter o tulo ka bulan, mas maayong susihon ang monthly contribution niini sa pinakaduol nga buhatan aron mahibaw-an kon na remit ba ang binulan niining kontribusyon.