Knowledge Sharing Gipangandaman

Ni Alex Mapoy

PhilRice Agusan del Norte Branch Director Abner Montecalvo. Photo

by Alex Mapoy

RTR, Agusan del Norte – Gipangandaman sa kadumalahan sa Philippine Rice Research Institute (PhilRice) Agusan del Norte ang nagsingabot nga Knowledge Sharing and Learning (KSL) diha sa Brgy. Basilisa, lungsod sa Remedios T. Romualdez (RTR) sakop sa probensya sa Agusan del Norte karong Hulyo 1 ning kasamtangang tuig.

Katuyoan niini ang pagtuki sa kasamtangan ug umaabot pa nga mga hagit sa sektor sa agrikultura nga angayang pangandaman.

Gawas niana, kabahin usab ang nahisgotang kalihokan sa pagpalapad paghatag edukasyon sa mga mag-uuma ingon man ang pagpresentar sa internet-based resource ug mga tools nga makasuporta sa extension intermediaries.

Segon ni Sharen T. Rivas sa PhilRice Agusan del Norte, lauman nga sa maong kalihokan, mabuksan ang mga oportunidad alang sa partnerships tali sa agricultural information ug technology dissemination.

Alang kang PhilRice Agusan Branch Director Abner Montecalvo, ila kining himuon isip pagtahod ug pag-ila sa mga stakeholders nga “essential channel” labi na sa pagsabwag og impormasyon kalabot sa agrikultura.

Nanghinaut si Montecalvo nga makahatag sila og ha-um sa panahon ingon man science-based information and technology aron masuportahan ang ilang mga paningkamot nga makatabang pagpalambo sa kinabuhi sa mga mag-uuma og uban pa nilang mga stakeholders. 

Pamugos sa opisyal, ang nahisgotang kalihokan ang bililhon alang sa mga stakeholders labi na sa mga mag-uuma kinsa maoy direktang makabenepisyo sa programa sa buhatan.

Nanghinaut na lamang ang opisyal nga daghang stakeholders ang motambong sa maong kalihokan labi na ang mga mag-uuma sa probensya.