P42.4-M BUB Fund Gitunol

Ni Alex Mapoy

BUTUAN CITY – Baynte-singko (25) ka mga lungsod ning rehiyon ang makapahimulos sa pundo balor P42,419,865 nga pinakaulahing gipagawas sa kadumalahan sa Department of Interior and Local Government (DILG) Caraga ilawom sa Bottom-Up Budgeting (BUB) program sa kagamhanan.

Ang nahisgutang pundo gamiton pagpabarug sa 19 ka mga Disaster Risk Reduction-Related projects, 12 ka Potable Water System projects, ug isa ka infrastructure project.

Sa Agusan del Norte, kinatibuk-ang P10,520,400 nga kantidad sa cheque ang nadawat sa unom ka mga lungsod alang sa 8 ka mga proyekto diin 3 niini alang sa Disaster Risk Reduction nga nagkantidad og P4.2 milyones, 4 sa potable water systems nga nagkantidad og P5.5 milyones, ug 1 ka infra project—Public Market nga nagbalor P820,400.

Ang mga lungsod nga nakadawat og cheque naglangkob sa Carmen diin nadawat niini ang P1.2 milyones, P820,400 sa Jabonga, P4 milyones sa Kitcharao, P1.2 milyones sa Nasipit, P1.8 milyones sa RTR, ug P1.5 milyones sa Santiago alang sa tulo ka mga proyekto.

Sa Agusan del Sur, nadawat sa upat ka mga lungsod ang P13, 420,000 milyones nga kantidad sa cheque alang sa 4 ka mga proyekto diin 1 sa DRR-related nga nagbalor P2.88 milyones ug 3 ka potable water systems balor P10.54 milyones.

Ang nahisgutang mga lungsod naglangkob sa Loreto diin nadawat ang P2.8 milyones, P2.88 milyones sa San Francisco, P4 milyones sa San Luis, ug P3.74 milyones sa Trento.

Sa Surigao del Norte, nadawat sa walo ka mga lungsod ang P10,479,465 nga kantidad sa cheque diin nadawat sa Bacuag ang P1.08 milyones nga kantidad sa cheque, P1.6 milyones sa Burgos, P700 mil sa Mainit, P1.2 milyones sa Malimono alang sa 2 ka projects, P2 milyones sa Pilar, P500 mil sa San Isidro, P1.4 milyones sa Socorro alang sa 2 ka proyekto, ug P2 milyones sa Sta. Monica alang sa 2 ka proyekto.

Sa Surigao del Sur, mokabat sa P 8,000,000 nga kantidad sa cheque ang nadawat sa 7 ka mga lungsod nga naglangkob sa Barobo diin nadawat ang P1.52 milyones), P1.3 milyones sa Bayabas, P500 mil sa Cantilan, P600 mil sa Cortes, P2.08 sa Hinatuan, P1 milyon sa Marihatag alang sa duha ka proyekto, ug P1 milyon sa San Agustin alang sa duha ka proyekto.

Sa datos nga nahuptan ni LGOO II Don Manuelo O. Patrimonio, padayong niubos ang “poverty incidence” sa rehiyon sa tabang sa BUB program sa goberno.

Tuig 2009, ang poverty incidence (PI) anaa sa 26.5%, apan pag-abot sa 2015, nilagpak ang PI sa 16.6% ning rehiyon.

Sukad sa tuig 2012, nagsilbing kabahin sa estratihiya sa kagamhanan ang BUB diin nagtinabangay ang National Government Agencies lakip niini ang DILG sa pagtubag sa panginahanglan sa nagkadaiyang komunidad ug pagtunol sa batakang serbisyo nga gipangunahan sa tanang Local Government Units (LGUs).

Sumala ni Patrimonio, ang 25 ka mga lungsod maoy nagsilbing “first batch” nga nakadawat og cheque samtang ang nahibiling 48 ka mga lungsod lakip ang mga siyudad ning rehiyon ang gigahinan usab og pundo ug laumang madawat usab niini ang tagsa-tagsa ka cheque sulod ning tuiga.

Kasamtangang gidumala ang DILG Caraga ni Regional Director Lilibeth A. Famacion, CESO III kinsa malaumon nga pinaagi sa pagpatuman sa mga proyektong pangkalamboan, makibhangan o mawala sa hingpit ang poverty incidence ning rehiyon.