Imported Thai Rice, Nakaabot na sa Caraga – NFA

Ni Alex Mapoy

120,000 ka sakong bugas humay nga gi-angkat gikan sa Thailand nahidangat na sa Surigao City Port. Magsilbi matod pa kining buffer stock alang sa umaabot nga lean months ning rehiyon. Courtesy of NFA Caraga

SURIGAO CITY – Gikomperma sa kadumalahan sa National Food Authority (NFA) Caraga nga nahidangat na sa Surigao City Port ang mga inangkat nga bugas gikan sa nasod sa Thailand.

Sa impormasyon nga gipaabot ni NFA Caraga Regional Director Genaro S. Nuñez, Jr. gisugdan na ang pagdiskarga sa 6,000 ka metriko tonelada nga bugas humay katumbas sa 120,000 ka sako.

“NFA Caraga Region started the unloading operations of the 6,000 MT imported rice from Thailand on June 8, 2015 at Surigao City Port and ended June 21, 2015, Sunday,” pagkomperma ni Nuñez.

Ang mga inangkat nga bugas gisakay sa VSG Pride kansang bulto nga bugas gitagana sa NFA Caraga alang sa kasamtangang semester ning rehiyon.

Dugang ni Nuñez, gikan sa nahisgutang pantalan, dalhon kini ngadto sa nagkadaiyang NFA warehouses ning rehiyon.

Gitin-aw sa direktor nga magsilbing buffer stock ug distribusyon ngadto sa accredited retailers region-wide ang maong mga bugas labi na sa umaabot nga lean months.

“The vessel, VSG Pride, carrying NFA Caraga Region’s imported rice allocation for this semester equivalent to 120,000 bags of rice which will be transferred to NFA warehouses in the region, purposely for buffer stocking and distribution in the market especially for the coming lean months,” dugang sa direktor.

Pasabot sa opisyal, kon ibaligya ang nahisgutang mga bugas sa mga accredited retailers, mapalit kini sa kantidad nga P27 ang kilo ug P32 ang kilo alang sa upgraded rice.

Subay niini, gipaneguro sa opisyal nga pabiling bastante ang suplay sa bugas ning rehiyon diin ang kasamtangang pundo sa bugas ang pa igo nga konsumohon sa mga Caraganons hangtod sa unang kwarter sunod tuig.