Anibersaryo Gitapos sa Tree Planting

Ni Alex Mapoy

TREEVOLUTION: Sento porsiyento nga gisuportahan sa tanang field offices sa DOJ-PPA Caraga ang gipahigayong tree planting sa Trevolution Site, Brgy. Bancasi ning siyudad adtong  Bernes sa buntag. Photo by Alex Mapoy

BUTUAN CITY – Gitak-opan sa Parole and Probation Administration (PPA) Caraga ang isa ka semana nga selebrasyon sa ika-39 ka tuig nga kasumaran sa ahensya pinaagi sa pagtanom sa 500 ka semilya nga kahoy sa Trevolution Site, Brgy. Bancasi ning siyudad adtong  Bernes sa buntag.

Ang nahisgutang mga semilya naglangkob sa kayam ug narra kansa malamposon kining natanom sa kapin 100 ka mga partisipante nga gipangunahan sa rehiyonal nga buhatan.

Gipasabot ni DOJ-PPA Caraga Regional Director Lina K. Burdeos, gihimo nila ang maong kalihokan isip pagselebrar sa kamugnaan sa ahensya ug pagpadayag sa ahensya sa pagpakabana sa kinaiyahan pinaagi sa pagpananom sa kahoy sa naasoy’ng dapit.

Dugang ni Dir. Burdeos, kaakohan sa matag Pilipino ang pag-atiman sa kinaiyahan hinungdan nga ang tanan angayang mo salmot sa maong kalihokan.

Gitin-aw sa opisyal, ang pagpananom sa mga probationers o parolees sa mga semilya sa kahoy wala kini nagtimaan nga angay lamang nila kining himuon sanglit duna silay nahimo nga kasal-anan kondi gihimo nila kini gumikan kay duna usab silay kaakohan pagpreserba sa kinaiyahan isip molupyo sa hamiling nasod.

Subay niini, gi-awhag sa direktor ang tanang kliyente nga aktibo kining mosalmot sa bisan unsang kalihokan nga pasiugdahan sa ahensya ug tumanon ang gipanumpa ang kondisyones aron mahuman ang probation o parole period.

Kinasingkasing usab kining nipaabot sa tanang nisalmot sa nahisgotang kalihokan hinungdan kini nagmalampuson.

“Sa tanan nga niduyog sa kalihokan, dako kaayo ang akong pagpasalamat nga kini nahimong successful tungod sa ilang full support. Sa atong mga kliyente, dako kaayo kini pagpakita sa ilang pagpahalaga sa atong kinaiyahan, kay sila, pareha kanato, dunay civic duty pag-preserbar sa atong kinaiyahan. So, atong mga kliyente, sama sa na andan, magpadayon sila sa pagtuman sa mga kondisyones, kinahanglan nga ila kining tumanon, unsay mga programa, mga rehabilitation activities para ma-successful nila o makompleto ang ilang probation period o parole period.”

“As Filipino citizen, duna silay kaakohan isip mga citizen sa atong nasod nga mo tabang sa mga kalihokan nga sama niini, mga environmental nga kalihokan, pagpanghinlo, pagpananom ngadto sa mga planting sites,” pagpasabot ni Dir. Burdeos.

Si Butuan City Host Lions Club President Paul Nagy, ang isa sa mga partisipante nga nisalmot sa maong kalihokan.