Caraganon Housewife Nisakmit og Pasidungog

Ni Alex Mapoy

AWARD: Malipayong gidawat ni Nelly Seletaria-Arangali ang pasidungog ug ganti gikan sa Department of Agriculture (DA). Photo courtesy of DA Caraga Information Officer II Rhea Abao. Courtesy of DA Caraga

BUTUAN CITY – Nisakmit og pasidungog ang 66 anyos nga Caraganon housewife human swerteng nakasulod sa Top 6 Outstanding Rural Women nationwide.

Subay niini, nadawat sa nahisgotan ang pasidungog gikan sa nasodnong buhatan sa Department of Agriculture (DA) plus plaque of recognition, ingon man ganti balor P75,000.

Ang mga nahisgotan, gidawat sa hingtungdan didto sa Philippine International Convention Center, Pasay City sa nakalabay’ng Hunyo 19 sa kasamtangang tuig.

Giila ni DA Caraga Information Officer II Rhea Abao ang swerte nga Butuanon wife nga si Nelly Seletaria-Arangali, 66 anyos, minyo, residente sa Brgy. Kinamlutan ning siyudad sa Butuan.

Sa Top 6 Outstanding Rural Women nationwide, si Arangali maoy second placer butang nga gipasigarbo pag-ayo sa rehiyonal nga buhatan ingon man sa mga Caraganon.

Ang 66 anyos nga Caraganon housewife, napasidunggan sa ahensya tungod sa gipakita niining kaandam ug paningkamot nga ang gitikad niining luna mahimong malahutayon nga “diversified organic farm” gikan sa simpleng organic farming.

Nagsilbing ehemplo ang gitikad nga uma sa nahisgotan sa organic technology ug nahimo usab kining instrumento nga madasig ang tanang mag-uuma nga mobalik sa organikong paagi sa panguma sanglit mas dako ang kitaon niini, apan gamay lamang ang gasto.

Subay sa pasidungog ug ganti nga nadawat, mapasalamaton ang nauwahi sa ahensya sa pag-ila niini sa nahimong kalamposan dungan sa pagkompisal nga dili niini maangkon ang maong kalamposan kon wala ang interbensyon sa ahensya – pinaagi sa pagtudlo sa bag-ong teknolohiya.

Hisayran ang search for 2015 Outstanding Rural Women, usa ka tinuig nga kalihokan nga gipasiugdahan sa Department of Agriculture (DA).

Gihimo kini sa ahensya isip pagpakita sa hugot niining suporta sa DA’s Gender and Development (GAD) kansa nagtumong nga mahatagan sa patas nga pagtagad ug kagahom ang kababayen-an.

Paagi usab kini nga mahatagan og kahigayonan ang kababayen-an nga nanimuyo sa probensya nga mapakita ang katakos pinaagi sa paglantaw sa ilang kakapas nga maoy nagsilbing dalan nga makab-ot ang kalamposan nga dili kahitupngan labi na sa natad pagpalambo sa agrikultura.

Si Agriculture Undersecretary for Special Concerns Bernadette Romulo-Puyat, nipaabot sa kinasingkasing niining pagsaludar ug pag-ila sa kababayen-ang probensyana nga dako’g nahatag tabang sa pagpalambo sa sektor sa agrikultura.

Gisaysay pa ni Puyat nga pinasikad sa National Statistics Office data, mokabat sa 3.2 milyones nga kababayen-an ang anaa sa sektor sa agrikultura.

Ang maong ihap, katumbas kini sa 21 porsyento nga labor force sa tibuok nasod kansang sektor nagtinabangay pagbugtaw nga makab-ot ang seguridad sa pagkaon ug mapalig-on ang ekonomikanhong aspeto sa probensya.