Igsuon sa SAF 44 Member, TESDA Specialista Na

Ni Alex Mapoy

BUTUAN CITY – Hingpit nang nahimo nga certified TESDA Specialista ang isa sa mga igsuon sa Fallen Special Action Force (SAF) 44 member human nipailawom og skills training.

Giila ni TESDA Caraga Supervising TESD Specialist Catalina O. Tacubao ang nahisgotan nga si Joel Inocencio, residente sa Brgy. Bonbon sakop ning siyudad.

Nakuha ni Inocencio ang National Certificate (NC) II Heavy Equipment Operator (HEO)-Wheel Loader human nipasar sa mandatory assessment.

Siya matod pa ang ikaupat nga membro sa pamilyang Inocencio samtang ang namatay’ng si SPO1 Lover Inocencio maoy nagsunod kaniya.

Nipailawom si Inocencio sa training sa HEO-Wheel Loader NC II ubos sa Training for Work Scholarship Program (TWSP) sa Butuan City Manpower Training Center (BCMC) ning siyudad.

Ang nahisgotang prebilihiyo nahatag ngadto sa nahisgotan human kini personal nga nibisita sa rehiyonal nga buhatan.

Awtomatiko nga gihimong iskolar ni TESDA-Caraga  Regional  Director  Florencio  F.  Sunico, Jr. si Inocencio.

Nagsugod gilayon ang nauwahi pag-training sa BCMC – usa ka training center nga gipundohan sa Local Government Unit (LGU) Butuan ug nipasar kini sa assessment adtong Hunyo 21 ning tuiga.

Sa kasamtangan, nagtrabaho si Inocencio isip foreman sa Ruin Construction nga nahimutang sa lungsod sa San Francisco Agusan del Sur.

Kinasingkasing usab nga nagpaabot ang nahisgotan sa ahensya sa tabang nga iyang nadawat sanglit alang kaniya, nakatabang kini pag-ayo kaniya labi na sa pagpanarbaho.

Kahinumdoman, adtong bulan sa Pebrero ning kasamtangang tuig, nibisita si Joel sa rehiyonal nga buhatan sa TESDA Caraga human siya gipahibalo sa isa sa mga empleyado sa TESDA Central Office nga nagpagawas og kamandoan si Sec. Joel Villanueva sa tanang regional ug provincial offices sa tibuok nasod nga tabangan ang nahibiling pamilya sa namatay’ng Fallen SAF 44 ug wala siya balibari sa iyang hangyo.