Checkpoint Batok Kawatan Gihimo

Ni Alex Mapoy

CHECKPOINT: Gipangunahan ni SPO4 Anisberto Rivera, Jr. ang pagpahigayon og random checkpoint. Puntirya nga girekisa ang mga motorsiklo nga maoy kasagaran gigamit sa mga kawatan paghimo sa dautan niining plano. Photo by Alex Mapoy

BUTUAN CITY –  Nisiaw na ang mga kawatan og motor sa dakbayan sa Butuan hinungdan nga nagpahigayon og random checkpoint ang kadumalahan ni Station Commander Police Senior Inspector Nefre Telewik Acaso sa Butuan City Police Station 1 sa nagkadaiyang kadalanan ning siyudad.

Puntirya matod pa ni SPO4 Anisberto Rivera, Jr. ang kasamtangang Officer-In-Charge sa Traffic Section sa maong presento dihang na abtan nga nagpahigayon og checkpoint sa dalang Montilla, ang mga naka-motorsiklo.

Katarungan ni SPO4 Rivera, mga single motor ang kasagaran nilang gipahunong sanglit ang single motor maoy kasagaran nga gigamit sa dautang elemento sa paghimo og kremin sama sa pagpangawat.

Gisaysay pa ni SPO4 Rivera, dihay single motor nga gi-parking lamang sulod sa Philippine Red Cross Butuan City – Agusan del Norte Chapter, apan, pagbalik sa tag-iya, nahanaw na ang gimanehoang motor sa dapit nga iyang giparkingan.

Kini ang hinungdan nga subsob ang ilang gihimong pagrekisa sa mga motorsiklo sa pangindahay nga madakpan ang mga kriminal.

Nagtuo usab ang opisyal nga daghang motor nga nagdagan ning siyudad nga walay kompletong papeles hinungdan nga pursigido ang kapulisan nga rekisahon ang mga motor.

Gitin-aw sa opisyal, walay laing tuyo ang kapulisan pagpahigayon og random checkpoint kondi ang pagpahugot lamang sa seguridad ning dakbayan.

“Gahapon diha sa Red Cross, gi-parking ang motor, pagawas sa tag-iya, wala na. So, mao na karon nga usa sa among gipahingusgan nga ma-check nang mga motor nga nagsauy-sauy sa siyudad nga walay saktong papeles para sa seguridad,” asoy ni SPO4 Rivera.