Meat Inspectors Gibansay

Ni Alex Mapoy

MEAT SHOPs: Angayang mamintina ang kalimpiyo 

sulod sa meat shop aron dili kini madaut, pahayag ni 

NMIS Caraga Senior Meat Control Officer Dr. 

Bernadette Montenegro. Photo by Alex Mapoy

BUTUAN CITY – Gibansay sa National Meat Inspection Service (NMIS) Caraga ang tanang lokal nga meat inspector kon unsaon paghimo og market surveillance sa nakalabay’ng semana.

Tanang meat inspector ang nagpahigayon og pagbisita sa nagkadaiyang meat shop isip kabahin sa training.

Gikabutyag ni NMIS Caraga Senior Meat Control Officer Dr. Bernadette Montenegro, gipa-obserba ang mga meat inspectors kon unsay estilo sa taga – meat shop labi na sa pag-display sa karne, pagbutang og label, pagplastar, ug pagmintina sa kahinlo sa palibot.

Dugang ni Dr. Montenegro, gihimo nila kini aron masayod ang mga nahisgotan kon unsay angayang obserbahan sa field ug angay nga buhaton.

Numero uno nga gidili sa buhatan ang pagtapad o pagsagol sa karne ug isda sa pag-display sanglit usa matod pa kini sa hinungdan nganong madaut ang karne.

Pamugos ni Dr. Montenegro, kon masagol o matapad ang karne ug isda pag-display, manimahong langsa ang karne.

“Eh, train namo ang tanang local nga meat inspector para sa market surveillance. Unsaon pag-monitor? Unsaon pag-surveillance? Part na ang meat shop. Kuha mi og data kon unsay practices sa meat shop. Among activity nag-involve pagtan-aw sa display, unsa ilang pag-label sa ilang product. Ang pag-arrange nila kon tama ba. Ang karne dili gyud puwede mahalo sa isda kay ang baho ma langsa. Ang general practices o cleanliness amo siyang gitan-aw,” pahayag ni Dr. Montenegro.

Sa maong paagi, nalantawan sa opisyal nga mas maseguro nga luwas konsumohon ang gibaligyang karne sa nagkadaiyang merkado publiko ug lakip na sa meat shops sanglit kabisado naman sa mga meat inspectors ang tahas nga gisangon sa buhatan kanila.

Dumduman nga atol sa gihimong pagbisita sa mga meat inspectors, kapin 100 kilos nga spoiled meat ang ilang nakompiska ug nalubong nga gipanag-iyahan sa usa ka meat shop nga nahimutang sa dalang Ochoa, Brgy. Limaha sakop ning siyudad.