Marpol Bill Napalabang sa Kongreso – Fortun

Ni Alex Mapoy

MARPOL: The proposed legislation on prevention and control of marine pollution (MARPOL) successfully hurdled scrutiny of the lower house and is now awaiting Senate’s version, says Cong. Fortun.

BUTUAN CITY – Napalabang na sa Ubos Balay Balauranan ang balaudnong Prevention and Control of Marine Pollution (MARPOL) nga gipangamahan ni Agusan del Norte First District Congressman Atty. Lawrence Lemuel H. Fortun.

Hisayran nga giduso sa batan-ong magbabalaud ang House Bill No. 861 nga gi-uloha’g An Act to Prevent and Control Pollution from Ships, Provide Penalties Therefor and Other Purposes nga nagtumong paghatag sulbad sa kalugak sa 1976 Presidential Decree 979 ug pagpatuman sa probisyones sa MARPOL 73/78 nga mas nailang International Convention for the Prevention of Pollution from Ships 1973, human giusab sa Protocol of 1978.

Ang maong balaudnon ang giduso sa House Committee on Ecology adtong Hulyo 24, 2013 ug gikonsolida uban ang pipila ka bersyon aron makahimo og bag-ong bersyon nga maoy unod sa House Bill 5377.

Sumala ni Cong. Fortun, bugtong gihulat ning higayona mao ang bersyon sa Senado lambigit sa maong balaudnon.

Gituohan sa kongresista, ang MARPOL Bill maoy usa sa mga balaudnon nga angayang ipalabang sa Senado.

Lantaw sa magbabalaud, ang maong balaudnon mao unyay magsilbing instrumento aron mapakusog ang “marine and coastal protection” batok sa polusyon nga dala sa nagkadaiyang barko.

Mas nipaspas ang pagpalabang sa maong balaudnon human nakomperma nga dunay toxic waste nga gilabay sa US Navy contractor sa kalawrang bahin sa Subic ug daghang insidente sa oil spills nga gilambigitan sa mga nalunod nga barko sama sa M/T Solar I sa Guimaras, M?T Makisig, ug M/V Sto. Tomas Aquinas.