Deworming Day Gipangandaman

Ni Alex Mapoy

Pursigido si DOH caraga Regional Director Dr. Jose 

Llacuna, Jr. nga purgahon ang kabataan aron 

magdako kini nga himsog.  

BUTUAN CITY – Doble-kayod ang buhatan sa Department of Health (DOH) sa pagpangandam sa gitakdang National School Deworming Day karong Hulyo 29 sa kasamtangang tuig.

Ang nahisgutang kalihokan ipahigayon uban sa pag-abag sa Department of Interior and Local Government (DILG), ug Department of Education (DepEd) diin ang mga estudyante maoy target nga benepisyaryo.

Nasabotan sa tulo ka mga ahensya nga magpahigayon og usa ka adlaw nga pagpamurga sa kabataang estudyante.

Hisayran nga target sa nahisgotang kampanya nga mapurga ang 16 milyones nga kabataan kinsa nagtungha sa pampublikong tunghaan.

Pipila sa mga timailhan sa batang gibitok mao ang abnormal nga pagdako sa tiyan, kalibangaon, pagsuka, ug pag-ubos sa timbang.

Dunay mga kaso nga bisan dili masinati ang maong mga timailhan, dili pa gihapon kini makonsidera nga wala kini bitok sa tiyan.

Ang bitok sa tiyan usa matod pa ka klase sa impeksyon diin dunay bitok sa tawo nga kusog mo supsop sa nutrisyon sa lawas nga angay lamang unta sa tawo.

Kon managhan matod pa kining klaseha sa bitok, ang hingtungdan kanunay lamang magluya.

Sa Pilipinas, mas ilado ang klase sa mga bitok ang roundworm (Ascaris), hookworm, ug whipworm (trichuris) sanglit mao kini ang kasagaran nga kuyanap.

Sumala ni DOH Caraga Regional Director Jose R. Llacuna, Jr., ang kabataan maoy magsilbing paglaum sa kasamtangang henerasyon hinungdan nga angayan lamang kining atimanon aron mahimo kining andam sa ilang kaugmaon.

Purgahon ang kabataang estudyante pinaagi sa paghatag kanila og tabletas nga Albendazole 400mg o kaha Mebendazole 500mg.

Epektibo matod pa ang maong mga tambal ug nasulayan na kini sa kadaghanan diin diyutay lamang ang makonsiderang “adverse reaction.”