P57.8M PAMANA Checks Gitunol

Ni Alex Mapoy

BUTUAN CITY – Duha ka mga probensya sa rehiyon sa Caraga ang hingpit nga nakadawat og pundo gikan sa panudlanan sa Department of Interior and Local Government (DILG) Caraga alang sa pagpatuman sa Payapa at Masaganang Pamayanan (PAMANA) projects atol sa gipahigayong Regional Peace and Order Council (RPOC) Second Quarterly Meeting diha sa Mazaua Island Resort ning siyudad bag-ohay lamang.

Nadawat sa Agusan del Sur ug Surigao del Sur ang cheque nga nagkantidad og P57.8 milyones.

Gikabutyag ni LGOO II Archie Rose G. Vasquez, sa kinatibuk-ang kantidad, gidawat ni Provincial Administrator Efren Rivas alang sa probensya sa Surigao del Sur ang cheque balor P33.8 milyones samtang gidawat usab ni Provincial Governor Adolph Edward G. Plaza ang cheque balor P24 milyones.

Ang pundo nga gidawat ni Rivas ang gamiton kini alang sa upat ka mga proyektong imprastraktura nga naglangkob sa construction sa 30 kilometros nga Carromata – Bitaugan Road Phase II nga nahimutang sa lungsod sa San Miguel, rehabilitasyon sa Union-Dogak-Rajah Cabungsuan Road Phase IV sa lungsod sa Lingig, Road Opening sa barangay proper padulong sa Camunohan, Bayogo Phase II sa lungsod sa Madrid, ug construction sa 15LM Single Lane Flat Slab Bridge II, Bayogo Phase II sa lungsod sa Madrid.

Sa pikas bahin, ang nadawat ni Gov. Plaza maoy gamiton alang sa construction sa tulay partikular na sa Sta. Irene-La Purisima Bridge nga nahimutang sa lungsod sa Prosperidad.

Gawas niana, nadawat usab sa gobernador ang cheque balor P7 milyones isip Performance Challenge Fund (PCF) 2014 alang sa “improvement” sa D.O Plaza Memorial Hospital.

Nanguna sa pagtunol sa nahisgotang mga cheque si DILG Caraga Regional Director Lilibeth A. Famacion uban nila RPOC Chair ug kasamtangang Butuan City Mayor Ferdinand M. Amante Jr., Police Regional Office (PRO) XIII PSSupt Pedro U Obaldo, ug MGen Oscar T. Lactao sa 4^th Infantry Division sa Philippine Army.