Prevalence Rate sa Overweight ug Obesity Gikaalarma

Ni Alex Mapoy 

Gidasig ni DOH Caraga RD Jose Llacuna, Jr. nga batasanon ang batasanon 

ang pagkaon sa gulay, prutas, legumes sama sa beans, ug uban pang 

pagkaon nga taas sa fiber aron makabaton sa himsog nga panglawas.

BUTUAN CITY – Gikaalarma sa kadumalahan sa Department of Health (DOH) Caraga ang pinakaulahing datos nga nahipos diin ang prevalence rate sa overweight ug obesity ning rehiyon nilansang sa 35%, mas taas kon itandi sa national prevalence rate nga 31.1%.

Subay niini,  doble-kayod ang kadumalahan ni DOH Caraga Regional Director Dr. Jose Llacuna, Jr. uban sa pag-abag sa National Nutrition Council (NNC) nga mahatagan sa tino nga kasulbaran ang nahisgutang kaso.

Tinguha ni Dir. Llacuna ug sa NNC nga makabaton sa himsog nga panglawas ang mga Caraganons diin kon dili man hingpit nga mawagtang ang maong suliran, makunhoran ang prevalence rate sa overweight ug obesity isip pagsuporta sa nasodnong kampanya nga makab-ot ang “normal weight.”

Sumala ni NNC Nutrition Officer II Rowena Gomez, mahatagan lamang og tukmang sulbad ang overweight ug obesity kon ang matag isa, mahatagan sa saktong nutrition ug physical activity.

Gitin-aw ni NNC Nutrition Officer II Rowena Gomez nga makabaton 

lamang sa himsog nga panglawas ang matag usa kon dunay saktong 

nutrisyon ug dugangan ang physical activity matag adlaw.

Alang ni Dir. Llacuna, importante nga mapatas-an ug mapalapdan ang kahibalo sa katawhang Caraganons kabahin sa kabililhon sa saktong nutrition ug physical activity.

Gawas niana, gidasig sa direktor ang publiko nga mohimo sa positibong desisyon kabahin sa healthy diet aron mapugngan ang bisan unsa mang matang sa non-communicable diseases ug usab makabaton sa himsog nga panglawas.

Dunay epekto, pag-angkon sa opisyal ang pag-usab sa dagan sa kapanahonan sa dietary patterns sa matag Pilipino diin ang kasagarang diyeta sa kasamtangang panahon naglangkob na sa cereals ug carbohydrates samtang mayorya sa katawhan ang dili na mahilig mo kaon og prutas ingon man gulay.

Tungod niini, naningkamot ang ahensya ilawom nga dili na madugangan ang prevalence sa overweight ug obesity sa kabataan ug sa mga hamtong pinaagi sa hugot nga pagpatuman sa Philippine Plan of Action for Nutrition (PPAN) 2011 – 2016.

Ilawom sa PPAN, hugot nga girekomenda ang healthy lifestyle, pagdugang sa physical activity, stress management, likayan ang pagpanigarilyo ug paghinubra pag-inom sa ilimnon nga daghan og alcohol.

Hugot usab nga girekomenda sa direktor nga matag adlaw, batasanon ang pagkaon sa gulay, prutas, legumes sama sa beans, ug uban pang pagkaon nga taas sa fiber aron makabaton sa himsog nga panglawas.

Hisayran ning bulan sa Hulyo, gisaulog sa ahensya ang Nutrition Month kansang selebrasyon gisabak sa tema, “Timbang iwasto, sa tamang nutrisyon at ehersisyo!”