Pipeline Naguba, Contractor Gipasidan-an

Ni Alex Mapoy

Daghang tubig ang na usik human aksidenteng na igo ang pipeline sa contractor nga nagpahigayon pagkonkreto sa kanal sa Del Pilar Street ning siyudad. Photo courtesy of BCWD.

BUTUAN CITY – Maayong pagkaguba sa isa sa mga tubo sa Butuan City Water District (BCWD) human aksidenteng na igo sa gihimong excavation resulta sa pagbugwak ug pagkausik sa bultong tubig diha sa Del Pilar Street sakop ning siyudad adtong Merkules sa buntag.

Subay niini, daling gipasidan-an sa kadumalahan ni BCWD General Manager Engr. Anselmo Sang Tian ang tanang contractors sa nagkadaiyang proyektong pang-imprastraktura ning siyudad nga mag-amping sa pagpatuman sa proyekto ug seguradohon nga dili maguba ang pipeline sa water district sama sa nahitabo ning nakalabay’ng adlaw.

Sa impormasyon ni BCWD Senior Public Relations Officer Ramil S. Barquin, partikular nga gipahimangnoan sa water district kadtong mga contractor nga nagpahigayon og excavation ug pagkonkreto sa mga kanal sa kadalanan.

Gitin-aw sa opisyal, kon maguba ang pipeline sa water district, seguradong maapektohan ang normal nga water pressure ug mabalda ang pagsuplay sa tubig ngadto sa mga konsumidor.

“BCWD is calling the attention of the contractors of the City’s infrastructure projects, such as excavation and concreting of canals alongside city streets, to instruct their personnel to be extra careful in conducting excavation activities so as not to accidentally cause damage to the pipelines. This call is made after the personnel of a contractor working along Del Pilar St. accidentally hit and damaged BCWD pipeline this morning. BCWD is reminding contractors that any damaged pipeline can disturb normal water pressure, thus, hampering water supply delivery,” mensahe ni Barquin.

Kahinumdoman nga adtong bulan sa Pebrero ning kasamtangang tuig, aksidente usab nga naguba ang 800mm diameter transmission line sa cut-off channel sa viaduct partikular na sa east bank sa floodway sa Mahay – Baan – Mahogany area human na igo sa gipatumang proyekto nga nagresulta sa pagkawala sa suplay sa tubig sa tibuok kasadpang bahin ning siyudad sulod sa pipila ka mga adlaw.