Ihap sa Pag-Ibig Members Nisaka

Ni Alex Mapoy

Gipasigarbo ni Pag-Ibig Butuan Branch Manager Christopher Loon ang pagtaas sa ihap sa mga membro sa buhatan gumikan sa pagbarug sa daghang negosyo ning siyudad ug subsob niini nga kampanya. Photo by Alex Mapoy

BUTUAN CITY – Mas nisaka ang ihap sa nahimong membro sa Pag-Ibig Butuan Branch sa bulan sa Hunyo sa kasamtangang tuig kon itandi sa samang bulan sa nakalabay’ng tuig 2014.

Basi sa datos, niabot sa 144,621 ang ihap sa mga aktibong membro sa bulan lamang sa Hunyo ning tuiga, mas taas kon itandi sa nakalabay’ng tuig sa samang bulan nga anaa lamang sa 133,554 ka buok nga mga aktibong membro sa buhatan.

Ang mga membro sa buhatan naglangkob kini sa mga empleyado sa pribadong sektor, empleyado sa gobernong buhatan, Overseas Filipino Workers (OFWs), ug mga self-paying individual.

Sumala ni Pag-Ibig Butuan Branch Manager Christopher Loon, nitaas ang ihap sa mga aktibong membro tungod sa pagbarug sa daghang mga balay pamatigayon ning siyudad.

Gawas niana, dugang ni Loon, bunga usab kini sa gipakusgang kampanya sa buhatan ngadto sa katawhan hinungdan nga daghan ang na engganyo nga magpa-membro.

Subay niini, gikalipay sa opisyal ang nahimong resulta sa ilang paningkamot sanglit mas daghang Butuanon o Caraganons ang makabenepisyo sa mga programang gihanyag.

Gitambagan usab sa nauwahi ang tanang membro nga dili mo palta paghatag sa binulan niining kontribusyon sa ingon makapahimulos kini sa tanang programa nga gihanyag sa buhatan.

Mas maayo usab matod pa nga batasanon ang pag-update sa monthly contribution labi na sa mga membro nga empleyado sa nagkadaiyang sektor aron mas sayong mahibaw-an kon na remit ba sa employer ang kaugalingong kontribusyon.

Sa maong paagi, masayod nang daan, matod pa sa opisyal ang hingtungdang membro sa estado sa iyang remittance kon mahimo ba kining maka-avail sa mga programang gihanyag sa buhatan.