33 Mayor sa Caraga Gidayeg

Ni Alex Mapoy

DENR Caraga Spokesperson Eric Gallego

BUTUAN CITY – Gidayeg sa kadumalahan sa Department of Environment and Natural Resources (DENR) Caraga ang 33 ka mga mayor ning rehiyon tungod sa aktibong partisipasyon sa National Greening Program ( NGP) pinaagi sa Bottoms-up Budgeting (BUB) scheme sa Department of Interior and Local Government (DILG).

Sumala ni DENR Caraga Spokesperson Eric Gallego, subleng gipahinumdom ni DENR-13 Regional Director Nonito M. Tamayo ang kabahin sa kagustohan ni Pangulong Noynoy Aquino nga molambigit ang katawhan sa pagmugna og plano ug motabang pagpatuman sa mga proyektong haum sa panginahanglan sa komunidad nga gipuy-an.

Dugang ni Gallego, gikomperma ni Dir. Tamayo nga pinaagi sa NGP nga gisuportahan sa BUB program, nakamugna kini og 4,856 ka mga trabaho nga napahimuslan sa 7,105 ka indibidwal gikan sa lima ka probensya ning rehiyon nga gilangkoban sa Agusan del Norte, Agusan del Sur, Surigao del Norte, Surigao del Sur, ug Province of Dinagat Island (PDI).

“The NGP through the BUB program has generated 4,856 jobs benefiting 7,105 in the five provinces of the region,” tipik sa pagkomperma ni Dir. Tamayo.

Ang BUB usa ka programa sa goberno diin ang komunidad ug ang lokal nga kagamhanan nagkauyon sa pagmugna sa nagkadaiyang plano ug pagpahiluna sa pundo aron hingpit nga mawagtang ang insidente sa kawad-on sa rehiyon.

Sa maong programa, nahatagan og igong kahigayonan ang komunidad nga makasalmot sa pagahimuong plano, pagpatuman, ug pagbantay sa gipatumang proyekto nga gilaumang maoy tubag sa ilang panginahanglan.

Alayon niini, nanawagan ang opisyal nga suportahan ang tanang programa sa goberno labi na ang NGP aron mabalik ang lunhaw nga palibot ug mabatokan ang epekto sa climate change.