42 Surrenderees sa Surigao, Wala Gi-angkon sa NPA

Ni Alex Mapoy

LIANGA, Surigao del Sur – Hugot nga gihimakak sa National Democratic Front – North Eastern Mindanao Region nga mga sakop sa rebeldeng grupo ang 42 ka mga tawo nga boluntaryong nitahan sa kaugalingon ngadto sa militar dala ang 23 ka mga tag-as nga kalibre sa armas sa lungsod sa Lianga sakop sa probensya sa Surigao del Sur adtong Agosto 25, 2015.

Sumala ni Ka Maria Malaya, mga sakop sa bandidong grupo nga gipangulohan ni Calpit Egua sa Santa Irene, Prosperidad, Agusan del Sur ug sa laing bandidong grupo sa Brgy. Gakub lungsod sa Carmen ug lungsod sa Lanuza sakop sa maong probensya.

Dugang ni Malaya, ang gipasiatab sa militar nga mga surrenderees, mao ra usab matod pa ang gitukod nga mga bandidong grupo.

Gi-alegahan ni Malaya, ang nahisgotang mga surrenderees maoy responsable sa subsob nga pagpanghasi ug pagpatay sa pipila ka lumad ug mag-uuma sa probensya sa Agusan ug Surigao.

“Kini nga mga surrenderees sakop sa bandidong grupo pinangulohan ni Calpit Egua sa Santa Irene, Prosperidad, Agusan del Sur ug sa laing bandidong grupo sa Gakub, Carmen ug Lanuza, Surigao del Sur. Ang gipasiatab sa militar nga mga surrenderees, ang ila ra usab gitukod nga mga bandidong grupo. Kini nga mga bandido ang nanghasi, nagpatay sa pipila ka lumad ug mag-uuma sa kabukiran sa Agusan ug Surigao,” tipik sa sulat pamahayag ni Malaya.

Gitumbok ni Malaya nga ang mga surrenderees nga dili lehitimo nga mga rebelde mao ang gipresentar sa mga opisyal sa militar partikular na sa 402^nd Brigade Philippine Army ug 4^th Infantry Division, Philippine Army atol sa gihimong Peace Caravan sa lungsod sa Lianga.