Scholarship Grant Gisagop

Ni Alex Mapoy

Dili angayang usikan sa mga iskolar sa UCPB-CIIF Foundation, Inc.  ang oportunidad nga makapadayon pagtungha sa kolehiyo sanglit talagsaon lamang kini nga kahigayonan, tambag ni PCA Caraga CPRO III Ernalyn E. Colon

BUTUAN CITY – Gisagop sa Philippine Coconut Authority (PCA) Caraga ang Coco Foundation Scholarship program sa United Coconut Planters Bank-Coconut Industry Investment Fund (UCPB-CIIF) Foundation, Inc. alang sa hayag nga kaugmaon sa mga anak sa mag-uuma sa lubi ning rehiyon.

Pinasikad sa datos sa PCA Caraga, mokabat sa kinatibuk-ang 989 ka mga estudyante ning rehiyon ang nahimong iskolar sa UCPB-CIIF Foundation, Inc. sulod ning tuiga.

Gikabutyag ni PCA Caraga CPRO III Ernalyn E. Colon, ang nahisgotang mga iskolar ang nagkuha sa nagkadaiyang kurso, vocational man o 4 hangtod 5 ka tuig.

Dugang ni Colon, nagtungha ang mga nahisgotan sa nagkadaiyang unibersidad dinhe sa isla sa Mindanao.

Pipila sa mga eskwelahan nga gitunghaan sa mga iskolar ang Caraga State University (CSU), Mindanao State University (MSU) – Marawi, MSU Zamboanga, Central Mindanao University (CMU), Surigao del Sur State University (SDSSU), Don Bosco Training Center sa Davao alang sa Technical Vocational Courses.

Gitin-aw sa opisyal, ang hingtungdang iskolar maoy gipapili kon unsa nga kurso ang ilang pagakuhaon aron pagseguro nga makahuman kini sa pag-eskwela sanglit ang kursong gikuha mao man ang ilang gustong kuhaon.

Subay niini, ang hingtungdang iskolar makadawat gikan sa UCPB-CIIF Foundation, Inc. og tag – P6,000 nga financial assistance alang sa tuition kada semester ug P1,750 nga monthly allowance.

Bugtong mintinahon nga grado sa iskolar mao lamang ang 80% sa ingon magpadayon kining makadawat sa ayudang pinansyal.

Tahas lamang sa PCA Caraga niini nga programa mao ang pag-assist ug pag-indorso sa mga anak sa mag-uuma sa lubi ngadto sa UCPB-CIIF Foundation, Inc.  nga angayang tabangan sa pagtungha sa kolehiyo.

Dugay na ang maong programa ug daghan na usab ang natabangan niini.