Steag Privatization Gikontra

Ni Alex Mapoy

BUTUAN CITY – Hugot nga gikontra sa Association of Mindanao Rural Electric Cooperatives, Inc. (AMRECO) ang plano sa National Power Corporation (NPC) - Power Sector Assets and Liabilities Management Corporation (PSALM) nga ipa-kontrata sa pribadong administrador ang pagdumala sa “capacity generation” sa STEAG State Power, Inc. (SPI).

Gikabalak-an sa AMRECO nga kon mahinayon ang plano sa NPC-PSALM, madugangan ang palas-anon sa mga konsumidor sanglit usbawan ang presyo sa kuryente ug daghan unya nga mga konsumidor ang mag-antos sa subsob nga brownout sa tibuok isla sa Mindanao.

Sumala ni AMRECO Executive Director Clint Django Pacana, kon dumalahon sa pribadong administrator ang SPI, dako ang posibilidad nga pili-on lamang kooperatiba nga baligyaan sa kuryente ug ang ubang kooperatiba sa kuryente sa tibuok Mindanao, dili baligyaan nga magresulta sa halapad nga brownout.

Natawo ang maong kabalaka tungod sa kasinatian diin human nga natugyan sa pribadong sektor ang Mt. Apo Geothermal sa nakalabay’ng tuig, pipila lamang ka mga kooperatiba ang nabaligyaan sa kuryente.

Dugang ni Pacana, kon mahinayon ang plano sa NPC-PSALM, ang kasamtangang presyo sa kuryente nga P3/kWh, mo saka unya kini ngadto sa P5.37/kWh.

Ang lakang sa NPC-PSALM, wala gikabalak-an sa kadumalahan ni Aneco General Manager Architect Horacio Santos sanglit kampante ang opisyal nga baligyaan gihapon kini sa SPI sanglit naila ang gidumalang kooperatiba nga best performer sa tibuok nasod.

Apan, sumala ni GM Santos, dili kinaiya sa Aneco nga iya-iyahon diin maneguro lamang sa kaugalingon kondi gilantaw usab niini ang negatibong epekto ngadto sa ubang kooperatiba sa kuryente sa tibuok Mindanao nga makasinati sa halapad nga brownout.

Dili matod pa makatugot si GM Santos nga magpahayahay ang konsumidor sa Aneco samtang ang liboang konsumidor sa mga kooperatiba nga dili na baligyaan sa SPI, mag-antos sa kawalay kuryente.

Hisayran nga pipila ka mga kooperatiba sa kuryente sa Mindanao ang dako’g utang sa NPC-PSALM hinungdan nga dako ang tsansa nga kadtong mga utangan nga kooperatiba nga dili maayo mo bayad sa utang, dili baligyaan.

Sa sambingay ni Engr. Noli Namocatcat sa Aneco, kon siya dunay tindahan, ang baligyaan sa iyang tinda mao kadtong nakabayad samtang kadtong pumapalit nga taas na kaayo ang listahan sa utang, dili niya kini hatagan.

Pamugos ni Engr. Namocatcat, ingon ani usab ang mahitabo unya kon itugyan sa pribadong administrador ang SPI diin pinili lamang ang mabaligyaan subay sa kasinatian sa Mt. Apo Geothermal Power Plant.

Alayon niini, suportado sa Aneco ang kampanya sa AMRECO nga i-asdang ang “Stop STEAG IPP Administration Privatization diin tumong niini nga makakab-ot og 200,000 ka mga perma sa tibuok Mindanao katumbas sa 200,000KW nga kapasidad sa SPI aron hangyuon si Pangulong Noynoy Aquino pagbabag sa plano sa NPC-PSALM.