Armed Groups Imbestigahan

Ni Alex Mapoy

Saad sa liderato ni PRO 13 13 PNP 

PCSupt Vert Chavez nga imbestiga-

han ang gikataho nga mga armadong 

grupo ning rehiyon ug andam niining 

sumpuon ang dautan niining buhat. 

Photo by Alex Mapoy

BUTUAN CITY – Imbestigahan sa liderato ni Police Regional Office (PRO) 13 PNP PCSupt Vert Chavez ang nanggawas nga reports kabahin sa mga armadong grupo nga nagtunhay sa pipila ka dapit ning rehiyon.

Una nang gikataho sa Karapatan Caraga nga dunay pito ka mga armadong grupo nga nagtunhay ning rehiyon nga gilangkoban sa Bagani Force, Magahat, Salakawan, Wild Dog, Lubog, Alsa Masa, Bongkatol Liberation Front (BULIF).

Gi-alegahan sa Karapatan Caraga nga nahimong hulga ang nahisgotang mga grupo sa seguridad sa mga yanong residente labi na sa mga hilit nga lugar.

Sumala ni PCSupt Chavez, i-validate gilayon sa kapulisan ang maong impormasyon aron mahatagan og sulbad ang gihimo matod pang pagpanghulga sa grupo.

Dugang ni PCSupt Chavez, imbestigahan ang gikaingong mga grupo ug kon makakuha og lig-on nga ebidensya batok sa mga nahisgotan, pangitaon gilayon kini kon asa naglihok.

Bahad sa direktor, pursigido ang iyang liderato pagpasaka og kaso batok sa naasoy’ng mga grupo labi na kon nakahimo kini og kalapasan sa balaud.

Dumduman nga gipasanginlan sa Karapatan Caraga ang nahisgotang mga grupo nga maoy hinungdan sa pagkatugaw sa pamuyo sa mga yanong residente.

Bunga sa gihimo sa armadong grupo, nangalisang ang mga residente hinungdan sa ilang pagbakwit.