ARB Master Plan Gibasura

Ni Alex Mapoy

Mga panelist sa Press Conference sa Agusan River Basin Summit nga gipangunahan ni Butuan Diocese Bishop Juan De Dios M. Pueblos.

BUTUAN CITY – Giklaro ni Agusan River Basin (ARB) Technical Working Group (TWG) Chair Maritess M. Ocampo nga nabasura ang gidusong Master Plan nga alang unta sa pagpalambo sa dagkong river basins sa nasod.

Sumala ni Ocampo, tuig 2007 pa lang, pinasubay sa RDC Resolution No. 45, ang Master Plan, wala aprubahi ug gibalik ngadto sa consulting agency CTI Engineering International Co. Unlimited., CCTI of Japan sa Association with Halcrow (UK) ug Woodfields Consultants Inc. (Philippines) alang sa dugang pagpalambo sa project outputs.

Pipila sa mga hinungdan nganong gibasura ang Master Plan tungod sa kakulang sa scientific assessment ingon man analysis sa biophysical aspect sa “basin”; kasagaran sa mga datos nga gihatag ang pulos “secondary sources” ug dili updated; dili usab matod pa “explicitly established” ang correlation ug inter-linkages tali sa hydrological, ecological, environmental, ug socio-economic components sa basin; naka-pokus lamang matod pa ang giduso nga institutional mechanism sa “river basin-wide structure” ug wala niini gilakip ang ubang lebel sa koordinasyon ingon man partisipasyon sama sa LGUs hangtod sa lebel sa komunidad; u gang giduso nga mga programa ingon mga proyekto ang daw tinigum lamang sa mga “generated list” sa mga programa ug proyekto gikan sa NGAs ug LGUs ug wala kini nagsumikad sa resulta sa makuti nga pagtuon.

Alayon niini, subleng tun-an ang Master Plan aron matumbok ug makakuha sa pinakaulahing impormasyon; paningkamotan usab nga makakuha sa “recent secondary ug primary data/information nga haum sa pag-update sa plano; ug daghan pang uban.

Ilakip usab sa Master Plan ang Region 10 labi na sa Claveria, Misamis Oriental; Cabanglasan, Impasugong ug dakbayan sa Malaybalay; sa Caraga, apil niini ang mga lungsod sa Carmen ug Buenavista sa Agusan del Norte, pipila ka bahin sa siyudad sa Bislig ug Surigao del Sur; Kapalong, Davao del Norte; Boston ug Cateel sa Davao Oriental.

Apil usab sa tun-an ang mga palisiya lambigit sa River basins ug Small Scale Mining.

Kabahin sa gihimong pagtuon ang pagpahigayon og Agusan River Basin Summit diin gikonsulta ang nagkadaiyang stakeholders aron makahimo sa nilangkob ug komprehensibong plano alang sa nasangpit nga lakang.