Buwis sa Mina Paubsan

Ni Alex Mapoy

TUBAY, Agusan del Norte – Nagpalabang ang Sangguniang Bayan sa Tubay nga paubsan ang kolektahong buwis gikan sa mga operator sa mina sa maong lungsod.

Unod sa Municipal Ordinance No. 2014 – 059 nga amyendahan ang nakalatid sa Section 2E.02 sa Article E sa Revenue Code sa lungsod sa Tubay aron paubsan ang Annual Business Tax nga gipatuman ngadto sa mga mining operators gikan sa 2% ngadto sa 1%.

Gihimong basehan Sangguniang Bayan Tubay ang nakalatid sa Section 3(a) sa Local Finance Circular No. 2-09, Series of 2009 nga kon ang kompanya sa mina nilambigit sa extraction sa minerales, ang angayan nga kuhaan kini’g Municipal Business Tax nga dili mo subra sa 2% sa gross receipts sa “preceding year.”

Pamugos sa Sangguniang Bayan Tubay, klaro sa maong probisyon nga ang 2% nga kolektahong buwis, wala lamang nag-limit niana nga porsyento sanglit gikonsidera lamang kini nga maximum rate sa ipahamtang nga buwis sa munisipyo ngadto sa mga kompanya sa mina nga nagtimaan nga puwede kining pa ubsan.

Sa Compromise Agreement sa duha ka partido, nagmando ang korte ubos sa Civil Case No. OC-11-03 ug Civil Case No. 13-09 nga giduso ngadto sa 10^th Judicial Region Branch 34 sa dakbayan sa Cabadbaran, Agusan del Norte nga kibhangan ang tax rate nga gipatuman gikan sa 2% ngadto sa 1% sa gross sales sa mo sunod nga tuig sa operisyon.

Sa boto nga 8-1-0 (pabor, dili pabor, ug abstain), nahukman sa mga konsehal sa lungsod sa Tubay nga makatarunganon lamang nga kibhangan ang 2% ngadto sa 1% ang kolektahong buwis gikan sa mining operators.

“An Ordinance Ammending Section 2E.02 of Article E of The Revenue Code of the Municipality of Tubay, by reducing the rate of annual business tax imposed on mining operators from two precent (2%) to one percent (1%) of the gross receipts for the preceding year of mining operation.”

Ang maong ordinansa, awtomatikong ipatuman sa higayon nga adaptahon ug ma-aprubahan sa Sangguniang Panlalawigan sa Agusan del Norte.