Examinees, Pakyas Pag-Eksam

Ni Alex Mapoy

BUTUAN CITY – Pipila ka mga examinees sa professional ug sub-professional ang pakyas pag-eksam taliwala nga kagahapong adlawa ang schedule.

Wala naka-eksam ang pipila kanila human na late kini sa gitakdang oras nga makasulod sa designated nga examination room.

Gipahayag ni CSC Caraga Regional Director Resurreccion Pueyo, niadtong nag-aplay ang mga nahisgotan alang sa eksaminasyon, gipasabot na silang daan nga kinahanglan nga adiser ang alas-7:00 ang takna sa buntag sa gitakdang adlaw sa eksaminasyon, anaa na kini sulod sa designated examination room aron makapangandam sa eksam.

Dugang ni Pueyo, gipahibalo na usab silang daan nga pagka-alas-7:30 sa buntag, sirad-an na ang gate sa tunghaan ug kadtong dili makasulod sa maong oras, dili na tugtan nga makasulod.

Subay sa nahitabo, gikadismaya sa opisyal kon nganong wala nakasulod ang mga nahisgotan sa tunghaan dis-a sila mag-eksam nga unta gipasabot naman silang daan ug simple lamang usab matod pa ang instruction nga magsayo.

Kahibaloan nga mokabat sa kinatibuk-ang 8,067 ka mga indibidwal ang nikuha sa eksaminasyon diin 7,212 ang nikuha sa professional samtang 855 sa sub-professional.