Kandidatora Daugon sa Estratihiya?

Ni Alex Mapoy 

Governor Ma. Angelica Rosedell Amante – Matba ug Sadeka Garcia-Tomaneng

AGUSAN DEL NORTE – Daugon matod pa sa estratihiya sa pangampanya ang posisyon sa pagka-gobernador sa Agusan del Norte human wala nahinayon ang igsuon batok igsuon sa pagka-gobernador ning probensya.

Human hingpit gitak-opan ang pagpangdawat sa Certificate of Candidacy (COC) adtong Bernes, ang posisyon sa pagka-gobernador sa probensya sa Agusan del Norte tigian o ilogan sa duha ka babae partikular na nila Governor Ma. Angelica Rosedell Amante – Matba ug Sadeka Garcia-Tomaneng.

Si Gov. Matba, notado na sa iyang estratihiya nga maayo molambing ngadto sa katawhan kansang estilo ang wala nausab latas sa katuigan, panahon man sa eleksyon o dili, ang maong estilo o kinaiya nga gipakita, wala nilubad.

Basi sa giluwatang pamahayag ni Cong. Erlpe John “Ping” Amante kinsa dunay kasuko ngadto sa iyang igsuon nga si Gov. Matba, ang iyang igsuon mahilig nga mo beso-beso, gakos-gakos, ug hilak-hilak hinungdan nga dali kining makakuha og simpatiya sa tawo.

Sa bahin usab ni Tumaneng kinsa maoy gihimong manok o gisuportahan ni Cong. Amante pagka-gobernador, gipahayag sa nauwahi nga mo gakos, mo halok usab siya apan kutob lang matod pa sa mga babae aron dili siya kasab-an o buwagan sa iyang bana.

Kon hisgotan matod pa ang pagpangga, mapinanggaon usab siya ug nasunod usab niya ang kinaiya sa ilang pamilya nga matinabangon ngadto sa mga nanginahanglan.

Gawas niana, magsilbi usab niyang “ALAS” batok kang Gov. Angel mao ang tabang sa tanan niining lideres sa ilang grupo.

Managlahi man ang estilo sa pagpangampanya sa duha, apan ang katawhan pa gihapon maoy kataposang mo pili pag-abot sa adlaw sa piliay.